ന്യൂഡൽഹി : കേരളത്തിൽ ഒരു മുഴുവൻ സമയ കെപിസിസി അധ്യക്ഷനെ ഉടൻ നിയമിക്കണമെന്ന് ഹൈക്കമാൻഡിനോട് ആവശ്യപ്പെട്ട് മുഖ്യമന്ത്രി വി.ഡി. സതീശൻ. ന്യൂഡൽഹിയിലെ പത്ത് ജൻപഥിൽ രാഹുൽ ഗാന്ധിയുമായി നടത്തിയ നിർണായക കൂടിക്കാഴ്ചയിലാണ് അദ്ദേഹം ഈ വിഷയം നേരിട്ട് ഉന്നയിച്ചത്. സംഘടനാ ചുമതലകളിൽ കൂടുതൽ ശ്രദ്ധ കേന്ദ്രീകരിക്കാൻ കഴിയുന്ന വ്യക്തി തലപ്പത്തേക്ക് വരുന്നത് വരാനിരിക്കുന്ന തിരഞ്ഞെടുപ്പുകളിൽ പാർട്ടിക്ക് വലിയ മുൻതൂക്കം നൽകുമെന്നും അധ്യക്ഷ പ്രഖ്യാപനം ഇനി വെച്ചുതാമസിപ്പിക്കരുതെന്നും സതീശൻ കൂടിക്കാഴ്ചയിൽ വ്യക്തമാക്കി.
അര മണിക്കൂറോളം നീണ്ടുനിന്ന ഈ കൂടിക്കാഴ്ചയിൽ വി ഡി സതീശൻ ഉന്നയിച്ച വിഷയങ്ങൾക്ക് വളരെ അനുകൂലമായ പ്രതികരണമാണ് രാഹുൽ ഗാന്ധി നൽകിയതെന്ന് കോൺഗ്രസ് വൃത്തങ്ങൾ വ്യക്തമാക്കി. പുതിയ അധ്യക്ഷന്റെ കാര്യത്തിൽ പാർട്ടി നേതൃത്വം ഉടൻ തന്നെ വ്യക്തമായൊരു തീരുമാനത്തിൽ എത്തുമെന്നും പ്രഖ്യാപനം വൈകില്ലെന്നും അദ്ദേഹം വി.ഡി. സതീശന് ഉറപ്പുനൽകി. സംസ്ഥാന കോൺഗ്രസ് രാഷ്ട്രീയകാര്യ സമിതിയിൽ ഉയർന്നുവന്ന ശക്തമായ പൊതുവികാരവും പാർട്ടിയെ താഴെത്തട്ടിൽ കൂടുതൽ സജീവമാക്കേണ്ടതിന്റെ ആവശ്യകതയും രാഹുൽ ഗാന്ധിയെ സതീശൻ ധരിപ്പിച്ചതായാണ് ഡൽഹിയിൽ നിന്നുള്ള വിവരങ്ങൾ സൂചിപ്പിക്കുന്നത്.
പുതിയ അധ്യക്ഷസ്ഥാനത്തേക്ക് ബെന്നി ബഹ്നാൻ, കൊടിക്കുന്നിൽ സുരേഷ്, ഷാഫി പറമ്പിൽ, ആന്റോ ആന്റണി തുടങ്ങിയ പേരുകൾ സജീവമായി പരിഗണിക്കപ്പെടുന്നുണ്ട്. കൂടാതെ മാത്യു കുഴൽനാടൻ, ജോസഫ് വാഴക്കൻ, ടി.എൻ. പ്രതാപൻ എന്നിവരുടെ പേരുകളും ചർച്ചകളിൽ മുന്നിലുണ്ട്. പാർട്ടി നേതൃത്വത്തിന്റെ തീരുമാനം വൈകാതെയുണ്ടാകുമെന്ന സൂചനകൾ പുറത്തുവന്നതോടെ വരും ദിവസങ്ങളിൽ സംസ്ഥാന കോൺഗ്രസ് സംഘടനാതലത്തിൽ നിർണായകമായ പല മാറ്റങ്ങൾക്കും വഴിതുറക്കുമെന്നാണ് കരുതപ്പെടുന്നത്.
