ന്യൂഡൽഹി: പാകിസ്താനേയും ചൈനയേയും ഒരേപോലെ വിറപ്പിച്ച ഭാരതത്തിന്റെ അത്യാധുനിക വ്യോമപ്രതിരോധ സംവിധാനമായ എസ്-400 (S-400 Triumf) വ്യോമപ്രതിരോധ മിസൈലിന്റെ അവസാന ഘട്ട വിതരണവും അടുത്ത തലമുറ ബ്രഹ്മോസ് (BrahMos-NG) മിസൈലുകളുടെ സംയുക്ത ഉൽപ്പാദനവും സംബന്ധിച്ച നിർണായക ചർച്ചകൾക്ക് ഡൽഹി വേദിയാകുന്നു. സെപ്റ്റംബർ 12-13 തീയതികളിൽ നടക്കുന്ന ബിആർഐസിഎസ് (BRICS) ഉച്ചകോടിക്ക് മുന്നോടിയായി സെപ്റ്റംബർ 11-ന് പ്രധാനമന്ത്രി നരേന്ദ്ര മോദിയും റഷ്യൻ പ്രസിഡന്റ് വ്ളാദിമിർ പുടിനും തമ്മിൽ നടത്തുന്ന ഉഭയകക്ഷി കൂടിക്കാഴ്ചയിലാണ് ഭാരതത്തിന്റെ അതിർത്തി സുരക്ഷ ശക്തമാക്കുന്ന ചരിത്രപരമായ കരാറുകൾ അന്തിമഘട്ടത്തിലെത്തുന്നത്.
റഷ്യയുമായി 2018 ഒക്ടോബറിൽ ഒപ്പുവെച്ച 5.43 ശതകോടി ഡോളറിന്റെ (ഏകദേശം 40,000 കോടി രൂപ) കരാറിലെ അഞ്ചാമത്തെയും അവസാനത്തെയും എസ്-400 റെജിമെന്റ് 2026 നവംബറോടെ ഭാരതത്തിന് പൂർണ്ണമായി കൈമാറുമെന്ന് ക്രെംലിൻ വക്താവ് ദിമിത്രി പെസ്കോവ് ഉറപ്പുനൽകി. റഷ്യ-യുക്രെയിൻ യുദ്ധത്തെത്തുടർന്ന് വൈകിയ അഞ്ചാം റെജിമെന്റ് കൂടി എത്തുന്നതോടെ ശത്രുരാജ്യങ്ങളുടെ ഏതൊരു വ്യോമാക്രമണ ശ്രമവും അതിർത്തി കടക്കും മുൻപ് തകർത്തെറിയാൻ ഭാരതസേനയ്ക്ക് സാധിക്കും. നിലവിൽ നാല് റെജിമെന്റുകൾ പഞ്ചാബ്, രാജസ്ഥാൻ, ജമ്മു അതിർത്തികളിലും വടക്കൻ അതിർത്തിയിൽ ചൈനയ്ക്കെതിരെയുമായി വിന്യസിച്ചിട്ടുണ്ട്. കഴിഞ്ഞ ഓപ്പറേഷൻ സിന്ദൂരിൽ 300 കിലോമീറ്ററിലധികം അകലെയുള്ള പാകിസ്താന്റെ നിരീക്ഷണ വിമാനം തകർത്ത് റെക്കോർഡ് കുറിച്ചതിലൂടെ എസ്-400 ന്റെ പോരാട്ടവീര്യം ആഗോളതലത്തിൽ തെളിയിക്കപ്പെട്ടതാണ്.
ഇതിനൊപ്പം സുഖോയ്, തേജ്വസ്, മിഗ്-29 യുദ്ധവിമാനങ്ങളിൽ നിന്ന് ഒരേസമയം വിക്ഷേപിക്കാവുന്ന ഭാരം കുറഞ്ഞ ബ്രഹ്മോസ് നെക്സ്റ്റ് ജനറേഷൻ (BrahMos-NG) മിസൈലുകളുടെ നിർമ്മാണവും ചർച്ചയാകും. കേവലം ആയുധങ്ങൾ വാങ്ങുന്ന രാജ്യം എന്നതിൽ ഉപരിയായി റഷ്യയുമായി ചേർന്ന് ആയുധങ്ങൾ സംയുക്തമായി വികസിപ്പിക്കാനും, നിർമ്മിക്കാനും, സൗഹൃദ രാജ്യങ്ങളിലേക്ക് കയറ്റുമതി ചെയ്യാനുമുള്ള ഭാരതത്തിന്റെ നീക്കങ്ങൾക്ക് ഈ മോദി-പുടിൻ കൂടിക്കാഴ്ച വലിയ ഊർജ്ജം നൽകും.
