ന്യൂഡൽഹി: വനിതാ ഏഷ്യാ കപ്പ് പോരാട്ടങ്ങൾ കളം നിറയുമ്പോൾ മൈതാനത്തെ പ്രകടനത്തിനൊപ്പം സോഷ്യൽ മീഡിയയിൽ തരംഗമാകുന്നത് പാകിസ്ഥാൻ താരങ്ങളുടെ വ്യത്യസ്തമായൊരു ചോയ്സ്. മത്സരത്തിനിടയിൽ പാകിസ്ഥാൻ വനിതാ താരങ്ങൾ അണിഞ്ഞ ഷൂസാണ് ഇപ്പോൾ ക്രിക്കറ്റ് പ്രേമികളുടെ ഇടയിൽ പ്രധാന ചർച്ചാവിഷയം. ഇന്ത്യൻ സൂപ്പർ താരം വിരാട് കോഹ്ലിയുടെ പ്രശസ്തമായ ലൈഫ്സ്റ്റൈൽ-സ്പോർട്സ്വെയർ ബ്രാൻഡായ ‘വൺ8’ന്റെ (one8) ഷൂസ് ധരിച്ചാണ് പാക് താരങ്ങൾ ഗ്രൗണ്ടിലിറങ്ങിയത്.
ഹോങ്കോങ്ങിനെതിരായ മത്സരത്തിനിടെ പാകിസ്ഥാന്റെ ഇടംകൈയൻ സ്പിന്നർ നഷ്ര സന്ധുവും ബാറ്റർ ഐമാൻ ഫാത്തിമയും ‘വൺ8’ ബ്രാൻഡിന്റെ ഷൂസ് അണിഞ്ഞ ദൃശ്യങ്ങൾ ക്യാമറയിൽ പതിഞ്ഞതോടെയാണ് സംഗതി സോഷ്യൽ മീഡിയ ഏറ്റെടുത്തത്. ചിത്രങ്ങളും വീഡിയോകളും വൈറലായതോടെ വലിയ രീതിയിലുള്ള പ്രതികരണങ്ങളാണ് ഉയർന്നുവരുന്നത്. ഇന്ത്യയോട് എത്ര കലിപ്പും രാഷ്ട്രീയ എതിർപ്പും കാണിച്ചാലും പാകിസ്ഥാന് അത്യാവശ്യ ഘട്ടങ്ങളിൽ ഇന്ത്യയെ ആശ്രയിക്കാതിരിക്കാൻ കഴിയില്ലെന്ന തരത്തിലുള്ള പരിഹാസങ്ങളും കമന്റുകളുമാണ് പ്രധാനമായും ഉയരുന്നത്.
അതേസമയം, പ്രമുഖ സ്പോർട്സ് വെയർ ബ്രാൻഡായ ‘വൺ8’ അടുത്തിടെ അജിലിറ്റാസ് സ്പോർട്സ് സ്വന്തമാക്കുകയും കോഹ്ലി ഇതിൽ വൻ നിക്ഷേപം നടത്തുകയും ചെയ്തിരുന്നു. വസ്ത്രങ്ങളും ഫുട്വെയറും അടക്കം അത്യാധുനിക കായിക ഉൽപന്നങ്ങളാണ് ഈ ബ്രാൻഡ് പുറത്തിറക്കുന്നത്. വിവാദങ്ങൾ ഒരുവശത്ത് പുകയുമ്പോഴും ഹോങ്കോങ്ങിനെതിരായ മത്സരത്തിൽ പാകിസ്ഥാൻ മിന്നും വിജയമാണ് സ്വന്തമാക്കിയത്. ഏഴ് റൺസ് മാത്രം വിട്ടുകൊടുത്ത് ആറ് വിക്കറ്റെടുത്ത നഷ്ര സന്ധുവിന്റെ കരിയറിലെ മികച്ച ബൗളിംഗ് പ്രകടനത്തിന്റെ മികവിൽ 72 റൺസിന് ജയിച്ച പാകിസ്ഥാൻ ടീം വനിതാ ഏഷ്യാ കപ്പിന്റെ സെമി ഫൈനലിൽ ഇടംപിടിച്ചു.
