പാക് അധീന കശ്മീരിലെ (PoK) ജനങ്ങളുടെ ദുരിതങ്ങളും പാകിസ്ഥാൻ സർക്കാരിന്റെ മനുഷ്യാവകാശ ലംഘനങ്ങളും അന്താരാഷ്ട്ര വേദികളിൽ തുറന്നുകാട്ടി ബാരാമുല്ലയിൽ നിന്നുള്ള യുവതി. ജനീവയിൽ നടന്ന യു.എൻ മനുഷ്യാവകാശ കൗൺസിലിന്റെ (UNHRC) 63-ാമത് സമ്മേളനത്തിലാണ് കശ്മീരിലെ ഭീകരബാധിതരുടെ സംഘടനയുമായി (ബന്ധപ്പെട്ട് പ്രവർത്തിക്കുന്ന സാമൂഹിക-രാഷ്ട്രീയ പ്രവർത്തകയായ തസ്ലീമ അക്തർ പാകിസ്ഥാന്റെ യഥാർത്ഥ മുഖം വെളിപ്പെടുത്തിയത്.
പ്രദേശത്ത് സമാധാനപരമായി അടിസ്ഥാന അവകാശങ്ങൾ ആവശ്യപ്പെട്ട് സമരം ചെയ്ത ജനങ്ങൾക്ക് നേരെ പാക് സുരക്ഷാ സേന വെടിയുതിർത്തതായി അവർ ചൂണ്ടിക്കാണിച്ചു. പൗരന്മാർക്ക് നേരെ നടക്കുന്ന ഓരോ കൊലപാതകത്തെക്കുറിച്ചും സ്വതന്ത്രവും നീതിയുക്തവുമായ അന്വേഷണം നടത്തണമെന്നും അവർ ആവശ്യപ്പെട്ടു.
പാകിസ്ഥാൻ അധീന കശ്മീരിനെ ‘ആസാദ് കശ്മീർ’ എന്ന് വിളിക്കുന്നത് പാകിസ്ഥാന്റെ ഏറ്റവും വലിയ നുണയാണെന്ന് ജനീവയിൽ വെച്ച് എൻ.ഡി.ടി.വിക്ക് നൽകിയ അഭിമുഖത്തിൽ തസ്ലീമ വ്യക്തമാക്കി. അടിസ്ഥാന അവകാശങ്ങൾ ചോദിക്കുന്ന ജനങ്ങൾക്ക് നേരെ വെടിയുതിർക്കുന്നതാണോ സ്വാതന്ത്ര്യമെന്നും അവർ ചോദിച്ചു. ഭീകരരെ അയച്ച് ജമ്മു കശ്മീരിനെ ശ്മശാനമാക്കാൻ ശ്രമിച്ച പാകിസ്ഥാൻ, ഇപ്പോൾ നിരപരാധികളായ പ്രക്ഷോഭകരെ കൊന്നൊടുക്കിക്കൊണ്ട് പാക് അധീന കശ്മീരിനെയും ശ്മശാനമാക്കി മാറ്റിയിരിക്കുകയാണെന്നും അവർ കുറ്റപ്പെടുത്തി. യു.എൻ വേദികളിൽ പാക് അധീന കശ്മീരിലെ ജനങ്ങളെ പ്രതിനിധീകരിക്കാൻ ആരുമുണ്ടായിരുന്നില്ലെന്നും, പകരം വ്യാജമായ കഥകൾ പ്രചരിപ്പിക്കാൻ ലണ്ടനിൽ നിന്നുള്ള വ്യക്തികളെയാണ് പാകിസ്ഥാൻ കൊണ്ടുവന്നതെന്നും അവർ ആരോപിച്ചു.
ജോയിന്റ് അവാമി ആക്ഷൻ കമ്മിറ്റിയുടെയും സിവിൽ സൊസൈറ്റിയുടെയും നേതൃത്വത്തിൽ പാക് അധീന കശ്മീരിൽ നടന്ന സമാധാനപരമായ പ്രതിഷേധങ്ങളെ സർക്കാർ ക്രൂരമായി അടിച്ചമർത്തുകയായിരുന്നു. നൂറുകണക്കിന് പ്രവർത്തകരെ അറസ്റ്റ് ചെയ്യുകയും പ്രധാന നേതാക്കളെ തടവിലാക്കുകയും ഇന്റർനെറ്റ് വിച്ഛേദിക്കുകയും ചെയ്ത പാകിസ്ഥാൻ ഭരണകൂടം വലിയ തോതിലുള്ള അക്രമങ്ങളാണ് അവിടെ അഴിച്ചുവിട്ടത്. പ്രദേശത്ത് പൗരാവകാശങ്ങൾ പൂർണ്ണമായി ഹനിക്കപ്പെട്ടിരിക്കുകയാണെന്നും, പാക് സേനയുടെ അതിക്രമങ്ങൾ അവസാനിപ്പിക്കാൻ യു.എൻ മനുഷ്യാവകാശ കൗൺസിൽ അടിയന്തരമായി ഇടപെടണമെന്നും തസ്ലീമ അക്തർ ആവശ്യപ്പെട്ടു.
