കൊച്ചി: റെയ്ഡിനിടെ പ്രത്യേക അന്വേഷണ സംഘം (എസ്.ഐ.ടി) പിടിച്ചെടുത്ത വിദേശ കറൻസികൾ തിരികെ നൽകണമെന്നാവശ്യപ്പെട്ട് റിപ്പോർട്ടർ ബ്രോഡ്കാസ്റ്റിങ് കമ്പനി എം.ഡി. ആന്റോ അഗസ്റ്റിൻ ഹർജി നൽകി. കളമശ്ശേരി മജിസ്ട്രേറ്റ് കോടതിയിലാണ് ആന്റോ അഗസ്റ്റിൻ ഇത് സംബന്ധിച്ച് അപേക്ഷ നൽകിയത്. 6,500 ഡോളറും 400 കെനിയൻ ഷില്ലിംഗുമാണ് പരിശോധന വേളയിൽ ഉദ്യോഗസ്ഥർ പിടിച്ചെടുത്തത്.
വിദേശ യാത്രകൾക്കായി കൈവശം കരുതിയ തുകയാണിതെന്നും, പിടിച്ചെടുത്ത കെനിയൻ കറൻസിയുടെ മൂല്യം 300 ഇന്ത്യൻ രൂപയിൽ താഴെ മാത്രമാണെന്നുമാണ് ആന്റോ അഗസ്റ്റിൻ ഹർജിയിലൂടെ കോടതിയെ അറിയിച്ചത്.
എന്നാൽ, ആന്റോ അഗസ്റ്റിന്റെ ആവശ്യത്തെ പോലീസും പ്രോസിക്യൂഷനും ശക്തമായി എതിർത്തു. പിടിച്ചെടുത്ത വിദേശ കറൻസികളിൽ ചിലത് വ്യാജമാണോ എന്നതടക്കമുള്ള കാര്യങ്ങളിൽ വിശദമായ പരിശോധനയും ഫോറൻസിക് ഓഡിറ്റിംഗും ആവശ്യമാണെന്ന് പോലീസ് വ്യക്തമാക്കി. വിദേശ കറൻസി ലഭിച്ചതിന്റെ ഉറവിടം (Source of funds) ഇതുവരെ വ്യക്തമായിട്ടില്ല. ഇതുമായി ബന്ധപ്പെട്ട വിവരങ്ങൾ ആദായനികുതി വകുപ്പിനും എൻഫോഴ്സ്മെന്റ് ഡയറക്ടറേറ്റിനും (ഇ.ഡി) കൈമാറിയിട്ടുണ്ടെന്നും, അവരുടെ ഔദ്യോഗിക റിപ്പോർട്ട് ലഭിച്ച ശേഷമേ തുക തിരികെ നൽകുന്നതിൽ തീരുമാനമെടുക്കാൻ സാധിക്കൂവെന്നും പോലീസ് കോടതിയെ അറിയിച്ചു.
അതിനിടെ, ലോകപ്രശസ്ത ഫുട്ബോൾ താരം ലയണൽ മെസ്സിയും അർജന്റീന ദേശീയ ടീമും കേരളത്തിലെത്തി മത്സരം കളിക്കുമെന്ന വാഗ്ദാനം നൽകി കോടികളുടെ സാമ്പത്തിക തട്ടിപ്പും വഞ്ചനയും നടത്തിയെന്ന കേസിൽ ആന്റോ അഗസ്റ്റിൻ സമർപ്പിച്ച മുൻകൂർ ജാമ്യാപേക്ഷയിൽ എറണാകുളം പ്രിൻസിപ്പൽ സെഷൻസ് കോടതി ഇന്ന് വിധി പറയും. വ്യാജ കരാർ രേഖകൾ ഉണ്ടാക്കൽ, ഗൂഢാലോചന തുടങ്ങിയ വകുപ്പുകൾ ചുമത്തിയാണ് കളമശ്ശേരി പോലീസ് കേസ് രജിസ്റ്റർ ചെയ്തിരിക്കുന്നത്. നിലവിൽ ആന്റോയെ ഉടൻ അറസ്റ്റ് ചെയ്യേണ്ടതില്ലെന്നും, ചോദ്യം ചെയ്യലിനായി ഹാജരാകാൻ നോട്ടീസ് നൽകുമെന്നുമാണ് അന്വേഷണ സംഘം കോടതിയെ അറിയിച്ചിട്ടുള്ളത്.
