ഇസ്‌ലാമാബാദ്: ഒസാമ ബിൻ ലാദനും അൽ-കെയ്ദ തലവൻ അയമാൻ അൽ-സവാഹിരിക്കും അമേരിക്കയുടെയും സൗദി അറേബ്യയുടെയും ധനസഹായത്തോടെ ഐ.എസ്.ഐ പരിശീലനം നൽകിയിരുന്നുവെന്ന ഞെട്ടിക്കുന്ന വെളിപ്പെടുത്തലുമായി മുതിർന്ന പാകിസ്താൻ രാഷ്ട്രീയ നേതാവ് മുശാഹിദ് ഹുസൈൻ സയ്യിദ്. സോവിയറ്റ് യൂണിയനെതിരായ അഫ്ഗാൻ യുദ്ധകാലത്ത് അമേരിക്കൻ രഹസ്യാന്വേഷണ വിഭാഗമായ സി.ഐ.എയുടെയും സൗദി അറേബ്യയുടെയും കോടിക്കണക്കിന് ഡോളർ ഉപയോഗിച്ച് ലക്ഷക്കണക്കിന് മുജാഹിദ് പോരാളികളെയാണ് പാകിസ്താൻ പരിശീലിപ്പിച്ചതെന്ന് അദ്ദേഹം തുറന്നടിച്ചു. ഒരു പ്രമുഖ പാക് ഡിജിറ്റൽ ടോക്ക് ഷോയിൽ സംസാരിക്കവെയാണ് ഈ വിവരങ്ങൾ പുറത്തുവിട്ടത്.
നവാസ് ഷെരീഫ് സർക്കാരിൽ മുൻ വിവരസാങ്കേതിക വകുപ്പ് മന്ത്രിയായിരുന്ന മുശാഹിദ് ഹുസൈന്റെ ഈ വെളിപ്പെടുത്തൽ അന്താരാഷ്ട്ര തലത്തിൽ തന്നെ വലിയ ചർച്ചയായിരിക്കുകയാണ്. ശീതയുദ്ധ കാലഘട്ടത്തിൽ അഫ്ഗാനിസ്ഥാനിലെ സോവിയറ്റ് ഇടപെടലിനെ പ്രതിരോധിക്കാൻ സി.ഐ.എ മാത്രം പാകിസ്താൻ രഹസ്യാന്വേഷണ ഏജൻസിയായ ഐ.എസ്.ഐക്ക് 2.1 ബില്യൺ ഡോളറിലധികം നൽകിയിട്ടുണ്ടെന്നാണ് അദ്ദേഹം വ്യക്തമാക്കിയത്. ഒരു ലക്ഷത്തോളം അഫ്ഗാൻ മുജാഹിദുകൾക്കും ഒസാമ ബിൻ ലാദൻ, അയമാൻ അൽ-സവാഹിരി തുടങ്ങിയ പ്രമുഖർ ഉൾപ്പെടെ 20,000-ത്തോളം അറബ് വോളന്റിയർമാർക്കും ഈ ഫണ്ടുപയോഗിച്ചാണ് പരിശീലനം നൽകിയത്.
ഇതിന് പുറമെ സൗദി അറേബ്യയും സമാനമായ രീതിയിൽ 2.1 ബില്യൺ ഡോളറിന്റെ ഫണ്ട് നൽകിയിരുന്നു. തുടർന്ന് വന്ന മറ്റ് സഹായങ്ങൾ കൂടിയായപ്പോൾ 1979-നും 1989-നും ഇടയിൽ അഫ്ഗാനിസ്ഥാനിൽ ഉപയോഗിച്ച ആകെ തുക അഞ്ച് ബില്യൺ ഡോളറോളം വരുമെന്നും അദ്ദേഹം പറഞ്ഞു. എന്നാൽ അഫ്ഗാൻ യുദ്ധം അവസാനിച്ചതോടെ ഈ പോരാളികളെല്ലാം ‘തൊഴിലില്ലാത്ത ജിഹാദികളായി’ മാറിയെന്നും, ഇവർ പിന്നീട് കശ്മീർ, പലസ്തീൻ, അൾജീരിയ തുടങ്ങിയ ലോകത്തെ മറ്റ് സംഘർഷ മേഖലകളിലേക്ക് നുഴഞ്ഞുകയറിയെന്നും അദ്ദേഹം കൂട്ടിച്ചേർത്തു. അഫ്ഗാൻ യുദ്ധകാലത്തെ പാകിസ്താന്റെ ഈ തന്ത്രപരമായ പ്രാധാന്യമാണ് രാജ്യത്തിന്റെ രഹസ്യ ആണവായുധ പദ്ധതികൾക്ക് തടസ്സമില്ലാതെ മുന്നോട്ട് പോകാൻ കളമൊരുക്കിയതെന്നും മുശാഹിദ് ഹുസൈൻ വ്യക്തമാക്കി.
