ഏഷ്യൻ ഗെയിംസ് ക്രിക്കറ്റിൽ സ്വർണ്ണമെഡൽ നേടിയത് അത്ര എളുപ്പത്തിൽ കിട്ടിയ ഒന്നല്ലെന്നും കഠിനാധ്വാനത്തിലൂടെയാണ് ഇന്ത്യ ഈ നേട്ടം സ്വന്തമാക്കിയതെന്നും മലയാളി വിക്കറ്റ് കീപ്പർ ബാറ്റർ സഞ്ജു സാംസൺ.
ശനിയാഴ്ച നടന്ന വാശിയേറിയ ഫൈനലിൽ ചിരവൈരികളായ പാകിസ്ഥാനെ 19 റൺസിന് പരാജയപ്പെടുത്തിയാണ് ഇന്ത്യ ഏഷ്യൻ ഗെയിംസിലെ സ്വർണ്ണമെഡൽ നിലനിർത്തിയത്. പരിചയസമ്പന്നരായ മുതിർന്ന താരങ്ങളെ ടീമിൽ ഉൾപ്പെടുത്തിയത് പാകിസ്ഥാനെതിരായ കലാശപ്പോരാട്ടത്തിലെ സമ്മർദ്ദം അതിജീവിക്കാൻ ടീമിനെ ഏറെ സഹായിച്ചുവെന്ന് മത്സരശേഷം സഞ്ജു പറഞ്ഞു. പരിശീലനവും മത്സരങ്ങളും തടസ്സപ്പെട്ടപ്പോഴും ഊർജ്ജസ്വലതയോടെ ഇരിക്കാനും ശ്രദ്ധ കേന്ദ്രീകരിക്കാനും ടീമിലെ പരിചയസമ്പന്നത സഹായിച്ചതായി അദ്ദേഹം വ്യക്തമാക്കി.
അഭിഷേക് ശർമ്മയുടെയും തിലക് വർമ്മയുടെയും അർദ്ധസെഞ്ചുറികളുടെ കരുത്തിൽ ഇന്ത്യ ഉയർത്തിയ 211 റൺസ് എന്ന കൂറ്റൻ സ്കോറിന് മറുപടിയായി പാകിസ്ഥാൻ 192 റൺസ് വരെ പൊരുതിയിരുന്നു. നല്ല ബാറ്റിംഗ് പിച്ചിൽ പാകിസ്ഥാൻ മികച്ച രീതിയിൽ തിരിച്ചടിച്ചതോടെ അവസാന നിമിഷം വരെ മത്സരം ആവേശകരമായി മാറി.
വെറുതെ കൈവെള്ളയിൽ വച്ച് തന്ന സ്വർണ്ണമല്ല ഇതെന്നും കഠിനമായി പ്രയത്നിച്ചു നേടിയ ജയമായതിനാൽ ഏറെ സംതൃപ്തിയുണ്ടെന്നും സഞ്ജു കൂട്ടിച്ചേർത്തു. രാജ്യം പ്രതിനിധീകരിച്ച് ഏഷ്യൻ ഗെയിംസ് ഫൈനലിൽ കളിക്കുക എന്നത് വലിയ അവസരമാണെന്നും, കളി തുടങ്ങിക്കഴിഞ്ഞാൽ സാഹചര്യങ്ങൾക്ക് അനുസരിച്ച് മികച്ച പ്രകടനം പുറത്തെടുക്കുക മാത്രമാണ് ചെയ്തതെന്നും അദ്ദേഹം പറഞ്ഞു.
