ഇംഗ്ലണ്ടിലെ കൗണ്ടി ക്രിക്കറ്റ് ജീവിതത്തിനിടയിൽ രാത്രി മുഴുവൻ വണ്ടിയോടിച്ച് പിറ്റേന്ന് അതി രാവിലെ ഗ്രൗണ്ടിലെത്തി മിന്നുന്ന സെഞ്ചുറി നേടിയ സാക്ഷാൽ സച്ചിൻ ടെണ്ടുൽക്കറുടെ വിസ്മയിപ്പിക്കുന്ന അനുഭവകഥ നിങ്ങളിൽ പലരും അറിയാത്ത ഒന്നാകും. 1991-ൽ യോർക്ക്‌ഷെയറിനായി കളിക്കുന്ന കാലത്താണ് സംഭവം. അന്ന് ഇംഗ്ലണ്ടിന്റെ ഭൂമിശാസ്ത്രത്തെക്കുറിച്ച് വ്യക്തമായ ധാരണയില്ലാതിരുന്ന സച്ചിൻ, അടുത്തടുത്ത ദിവസങ്ങളിൽ രാജ്യത്തിന്റെ രണ്ട് വ്യത്യസ്ത കോണുകളിലായി നടന്ന മത്സരങ്ങളിൽ പങ്കാളിയാകാൻ സമ്മതിക്കുകയായിരുന്നു.
ലണ്ടനിലായിരുന്നു ആദ്യ മത്സരം. യോർക്ക്‌ഷെയറിൽ നിന്ന് വണ്ടിയോടിച്ച് ലണ്ടനിലെത്തിയ സച്ചിൻ പങ്കെടുത്ത മത്സരം അർദ്ധരാത്രിയോടെയാണ് അവസാനിച്ചത്. മത്സരശേഷം ഹോട്ടലിലെത്തിയ സച്ചിൻ പിറ്റേന്ന് രാവിലെ ന്യൂകാസിലിൽ മറ്റൊരു മത്സരമുണ്ടെന്ന് സഹതാരങ്ങളെ അറിയിച്ചപ്പോഴാണ് സമയബന്ധിതമായി അവിടെയെത്താൻ ഉടനടി യാത്ര തിരിക്കണമെന്ന് അവർ നിർദ്ദേശിച്ചത്.
തുടർന്ന് സഹതാരം ജതിൻ പരാഞ്ജ്പെയ്ക്കൊപ്പം സച്ചിൻ ഉടൻ തന്നെ ന്യൂകാസിലിലേക്ക് രാത്രി വൈകി യാത്ര തിരിച്ചു. വഴി അറിയാത്തതിനാൽ ചില പ്രധാന തിരിവുകൾ തെറ്റിപ്പോകുകയും രാവിലെ 8:15 ഓടെ മാത്രം ന്യൂകാസിലിൽ എത്തിച്ചേരുകയുമായിരുന്നു. അപ്പോഴേക്കും ടീം ബസ് മൈതാനത്തേക്ക് പുറപ്പെടാൻ തയ്യാറെടുത്തിരുന്നു. സച്ചിന്റെ അഭ്യർത്ഥനപ്രകാരം ടീം മാനേജർ ഒരു മണിക്കൂർ വിശ്രമം അനുവദിച്ചു.
തുടർന്ന് കൃത്യസമയത്ത് തന്നെ ഗ്രൗണ്ടിലെത്തിയ സച്ചിൻ അന്നത്തെ മത്സരം മുഴുവൻ കളിക്കുകയും തകർപ്പൻ സെഞ്ചുറി നേടുകയും ചെയ്തു. ഉച്ചഭക്ഷണത്തിന് ശേഷമുള്ള ഫീൽഡിംഗിനിടെ ഓവറുകൾക്കിടയിലെ 10 സെക്കൻഡ് ഇടവേളകളിൽ നിന്ന് ഉറങ്ങി വീണാണ് സച്ചിൻ ക്ഷീണമകറ്റിയത്. കളി പൂർത്തിയാക്കി ഹോട്ടലിലെത്തിയ താരം രാത്രി ഭക്ഷണം പോലും ഉപേക്ഷിച്ച് നേരെ ഉറക്കത്തിലേക്ക് വീഴുകയായിരുന്നു.
