ജനവിധിയിൽ നിരന്തരം തിരിച്ചടി നേരിടുന്ന പ്രതിപക്ഷ പാർട്ടികൾ ഡൽഹിയിൽ നടത്തുന്ന സമരത്തിനിടെ നരേന്ദ്ര മോദിക്ക് അനുകൂലമായി മുദ്രാവാക്യം വിളിച്ച യുവാവിന് നേരെ അതിക്രമം. കേന്ദ്ര സർക്കാരിനും തിരഞ്ഞെടുപ്പ് കമ്മീഷനുമെതിരെ ‘ഇൻഡി’ മുന്നണി നടത്തുന്ന പ്രതിഷേധത്തിനിടയിലാണ് ജനാധിപത്യ മൂല്യങ്ങളെ കാറ്റിൽപ്പറത്തിക്കൊണ്ടുള്ള അക്രമ സംഭവം നടന്നത്. പ്രധാനമന്ത്രി നരേന്ദ്ര മോദിയുടെ പേര് ഉറക്കെ വിളിച്ചുപറഞ്ഞ യുവാവിനെ പ്രകോപിതരായ പ്രതിപക്ഷ പ്രവർത്തകർ വളഞ്ഞിട്ട് ക്രൂരമായി മർദ്ദിക്കുകയായിരുന്നു.
വോട്ടർപട്ടികയുടെ പ്രത്യേക തീവ്ര പരിഷ്‌കരണത്തിൽ അപാകതകൾ ആരോപിച്ച് മൂന്നാം ദിവസവും തുടരുന്ന സമരപന്തലിലാണ് നാടകീയ രംഗങ്ങൾ അരങ്ങേറിയത്. കേന്ദ്ര വിരുദ്ധ മുദ്രാവാക്യങ്ങൾക്കിടയിൽ നിൽക്കുകയായിരുന്ന യുവാവ് പെട്ടെന്ന് മോദി അനുകൂല മുദ്രാവാക്യങ്ങൾ ഉറക്കെ വിളിക്കുകയായിരുന്നു. ഇതോടെ അസഹിഷ്ണുത പൂണ്ട പ്രതിപക്ഷ പ്രവർത്തകർ ഇയാളെ ക്രൂരമായി തള്ളിമാറ്റുകയും വളഞ്ഞിട്ട് ആക്രമിക്കുകയുമായിരുന്നു. രാഹുൽ ഗാന്ധിയെ അപമാനിച്ചു എന്ന ന്യായീകരണം ഉന്നയിച്ചാണ് അക്രമികൾ മർദ്ദനം ന്യായീകരിക്കാൻ ശ്രമിക്കുന്നത്.
രാജ്യ തലസ്ഥാനത്ത് ജനാധിപത്യപരമായി അഭിപ്രായം രേഖപ്പെടുത്താനുള്ള സ്വാതന്ത്ര്യത്തിന് മേലാണ് പ്രതിപക്ഷ കക്ഷികൾ കരിനിഴൽ വീഴ്ത്തിയിരിക്കുന്നത്. സംഭവത്തിന്റെ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെ, എതിർശബ്ദങ്ങളെ കായികമായി നേരിടുന്ന ഇത്തരം സമീപനങ്ങൾക്കെതിരെ ശക്തമായ രോഷമാണ് ജനങ്ങൾക്കിടയിൽ ഉയർന്നുവരുന്നത്. ജനാധിപത്യത്തെക്കുറിച്ച് പ്രസംഗിക്കുന്നവർ തന്നെ തെരുവിൽ അക്രമം അഴിച്ചുവിടുന്നത് പ്രതിപക്ഷത്തിന്റെ യഥാർത്ഥ മുഖം തുറന്നുകാട്ടുന്നതാണെന്ന് ചൂണ്ടിക്കാണിക്കപ്പെടുന്നു.
