ന്യൂയോർക്ക്: ഐക്യരാഷ്ട്രസഭയിൽ (UNGA) പാകിസ്താന്റെ ഭീകരവാദ ഇരട്ടത്താപ്പുകൾ ലോകത്തിന് മുന്നിൽ തുറന്നുകാട്ടി ഇന്ത്യയുടെ കടുത്ത കടന്നാക്രമണം. ഷെഹ്ബാസ് ശരീഫ് നയിക്കുന്ന പാക് ഭരണകൂടത്തെ ‘ഫോം 47 സർക്കാർ’ (Form 47 Government) എന്ന് വിശേഷിപ്പിച്ച ഭാരതം, അയൽരാജ്യങ്ങളെ തകർക്കാൻ പാകിസ്താൻ താലോലിച്ചു വളർത്തിയ ഭീകരവാദികളായ ‘ഫ്രാങ്കൻസ്റ്റൈനുകൾ’ (Frankensteins) ഇന്ന് അവരുടെ തന്നെ നിയന്ത്രണം വിട്ട് സ്വന്തം രാജ്യത്ത് നാശം വിതയ്ക്കുകയാണെന്ന് കുറ്റപ്പെടുത്തി. ഐക്യരാഷ്ട്രസഭയിലെ ഇന്ത്യയുടെ ഫസ്റ്റ് സെക്രട്ടറി രഘു പുരിയാണ് പാകിസ്താന് ശക്തമായ മറുപടി നൽകിയത്.
വസ്തുതകൾ മറച്ചുവെച്ച് അന്താരാഷ്ട്ര വേദിയിൽ സ്വയം ഇരയായി ചിത്രീകരിക്കാനാണ് പാകിസ്താൻ ശ്രമിക്കുന്നത്. ഭീകരവാദത്തെ തുരത്താൻ പ്രയത്നിക്കുന്നതിന് പകരം വ്യാജ പ്രചാരണങ്ങൾ അഴിച്ചുവിടാനാണ് ഇസ്‌ലാമാബാദ് തങ്ങളുടെ മുഴുവൻ ഊർജ്ജവും ചെലവഴിക്കുന്നത്. ലോകസമാധാനത്തിന് യഥാർത്ഥത്തിൽ തടസ്സം നിൽക്കുന്നത് പാകിസ്താന്റെ ഈ നയങ്ങളാണെന്നും, ഒരേസമയം ഓടിയും വേട്ടയാടിയും ഇരട്ടത്താപ്പ് കളിക്കാൻ പാകിസ്താന് സാധിക്കില്ലെന്നും ഇന്ത്യ തുറന്നടിച്ചു.
പാകിസ്താൻ ഭരണകൂടത്തെ ‘ഫോം 47 സർക്കാർ’ എന്ന് ഇന്ത്യ വിശേഷിപ്പിച്ചത് അന്താരാഷ്ട്ര തലത്തിൽ വലിയ ചർച്ചയായിട്ടുണ്ട്. 2024 ഫെബ്രുവരിയിൽ പാകിസ്താനിൽ നടന്ന പൊതുതിരഞ്ഞെടുപ്പിൽ വൻതോതിൽ അട്ടിമറി നടത്തിയാണ് ഷെഹ്ബാസ് ശരീഫ് – ആർമി ചീഫ് അസിം മുനീർ സഖ്യം അധികാരത്തിലെത്തിയതെന്ന ആരോപണമാണ് ഈ വാക്കിന് പിന്നിലുള്ളത്. പോളിങ് ബൂത്തുകളിലെ യഥാർത്ഥ വോട്ടിങ് കണക്കുകൾ രേഖപ്പെടുത്തുന്ന ഫോം 45 മാറ്റിമറിച്ച്, വോട്ടെണ്ണൽ കേന്ദ്രങ്ങളിൽ ഫലം തിരുത്തി തയ്യാറാക്കുന്ന ഫോം 47 വഴിയാണ് ഇവർ ഭരണം പിടിച്ചെടുത്തതെന്ന് ഇമ്രാൻ ഖാന്റെ പാർട്ടിയായ പി.ടി.ഐ ആരോപിച്ചിരുന്നു. ജനാധിപത്യപരമായ സാധുതപോലുമില്ലാത്ത ഒരു സർക്കാരാണ് പാകിസ്താൻ ഭരിക്കുന്നതെന്ന രാഷ്ട്രീയ യാഥാർത്ഥ്യം കൂടിയാണ് ഇന്ത്യ ആഗോള വേദിയിൽ തുറന്നുകാട്ടിയത്.
