ഇന്ത്യൻ ക്രിക്കറ്റിലെ ഭാവി നായകനെന്ന നിലയിൽ ശ്രദ്ധ നേടുന്ന യുവതാരം ആയുഷ് മാത്രെ, മുൻ ഇന്ത്യൻ നായകൻ എം.എസ്. ധോണിയിൽനിന്ന് ലഭിച്ച നിർണായക ഉപദേശത്തെക്കുറിച്ച് മനസുതുറന്നു. സമ്മർദഘട്ടങ്ങളിൽ ശാന്തത കൈവിടരുതെന്നും ദേഷ്യത്തിൽ തീരുമാനങ്ങൾ എടുക്കരുതെന്നുമുള്ള ധോണിയുടെ നിർദേശമാണ് തന്റെ നായകത്വ മികവ് മെച്ചപ്പെടുത്താൻ സഹായിച്ചതെന്ന് 19-കാരൻ വെളിപ്പെടുത്തി.
2026ലെ അണ്ടർ 19 ലോകകപ്പിൽ ഇന്ത്യയെ കിരീടത്തിലേക്ക് നയിച്ച താരമാണ് മാത്രെ. ചെന്നൈ സൂപ്പർ കിങ്‌സിന്റെ താരമായ അദ്ദേഹം വരും വർഷങ്ങളിൽ ഇന്ത്യൻ സീനിയർ ടീമിലും നിർണായക സാന്നിധ്യമായി മാറുമെന്നാണ് പ്രതീക്ഷ. ഇതിനിടെ, 2026-27 സീസണിലെ രഞ്ജി ട്രോഫിക്കായി 42 തവണ ചാമ്പ്യന്മാരായ മുംബൈ ടീമിന്റെ വൈസ് ക്യാപ്റ്റനായും മാത്രെ നിയമിക്കപ്പെട്ടു.
കളിക്കളത്തിലും പുറത്തും ശാന്തത പാലിക്കണമെന്നാണ് ധോണി തനിക്ക് നൽകിയ പ്രധാന ഉപദേശമെന്ന് മാത്രെ പറഞ്ഞു. ഒരു ടീമിന്റെ നായകനാകുമ്പോൾ ആത്മസംയമനം ഏറെ പ്രധാനമാണ്. ദേഷ്യം ഏതാനും മിനിറ്റുകൾ മാത്രമേ നീണ്ടുനിൽക്കൂവെങ്കിലും ആ സമയത്ത് എടുക്കുന്ന തീരുമാനങ്ങൾ പലപ്പോഴും തെറ്റായിപ്പോകും. മനസ്സ് ശാന്തമാകുമ്പോൾ കൂടുതൽ വ്യക്തതയോടെ ചിന്തിക്കാനും മികച്ച തീരുമാനങ്ങൾ എടുക്കാനും സാധിക്കുമെന്ന് ധോണി ഉപദേശിച്ചതായി താരം വ്യക്തമാക്കി.
അണ്ടർ 19 കാലഘട്ടത്തിൽ ഈ ഉപദേശം ഏറെ സഹായിച്ചെന്നും ഇപ്പോഴും അത് പിന്തുടരാൻ ശ്രമിക്കാറുണ്ടെന്നും മാത്രെ കൂട്ടിച്ചേർത്തു. കളിക്കളത്തിൽ ശാന്തത നിലനിർത്തുന്നത് വ്യക്തിക്കും ടീമിനും ഒരുപോലെ ഗുണകരമാണെന്നും താരം പറഞ്ഞു. മുംബൈയുടെ രഞ്ജി ട്രോഫി മത്സരങ്ങൾക്ക് മുന്നോടിയായി വാംഖഡെ സ്റ്റേഡിയത്തിൽ വ്യാഴാഴ്ച നടത്തിയ വാർത്താസമ്മേളനത്തിലാണ് മാത്രെ ഇക്കാര്യങ്ങൾ വെളിപ്പെടുത്തിയത്.
മുംബൈ ടീമിന്റെ വൈസ് ക്യാപ്റ്റനാകാൻ കഴിഞ്ഞത് വലിയ ബഹുമതിയായാണ് കാണുന്നതെന്നും താരം പറഞ്ഞു. 42 തവണ രഞ്ജി ട്രോഫി കിരീടം നേടിയ ടീമിനെ പ്രതിനിധീകരിക്കുന്നതും ഈ ഉത്തരവാദിത്വം ഏറ്റെടുക്കുന്നതും അഭിമാനകരമായ നേട്ടമാണ്. ടീമിലെ സഹതാരങ്ങളിൽനിന്നും മുതിർന്ന കളിക്കാരിൽനിന്നും മികച്ച പിന്തുണയാണ് ലഭിക്കുന്നതെന്നും മാത്രെ വ്യക്തമാക്കി.
തന്നെ ഒരു ജൂനിയർ താരമായി മാറ്റിനിർത്തുകയോ ടീമിൽനിന്ന് അകറ്റിനിർത്തുകയോ ചെയ്യുന്ന സാഹചര്യമില്ലെന്നും സിദ്ധേഷ് ലാഡും മറ്റ് മുതിർന്ന താരങ്ങളും സ്വതന്ത്രമായി അഭിപ്രായങ്ങൾ പ്രകടിപ്പിക്കാൻ അവസരം നൽകുന്നുണ്ടെന്നും അദ്ദേഹം പറഞ്ഞു. ടീമിന്റെ ഭാഗമാണെന്ന തോന്നൽ എല്ലാവരും ഉറപ്പാക്കുന്നുണ്ടെന്നും മാത്രെ കൂട്ടിച്ചേർത്തു.
ധോണിയുടെ ശാന്തതയും സമ്മർദഘട്ടങ്ങളിൽ തീരുമാനമെടുക്കാനുള്ള മികവും ക്രിക്കറ്റ് ലോകത്ത് ഏറെ പ്രശസ്തമാണ്. ആ അനുഭവസമ്പത്തിൽനിന്ന് ലഭിച്ച ഉപദേശം തന്റെ നായകത്വത്തിൽ പ്രാവർത്തികമാക്കാനാണ് ആയുഷ് മാത്രെയുടെ ശ്രമം. ചെറുപ്രായത്തിൽ തന്നെ ദേശീയ തലത്തിലും ആഭ്യന്തര ക്രിക്കറ്റിലും നേതൃത്വപരമായ ഉത്തരവാദിത്വങ്ങൾ ഏറ്റെടുക്കുന്ന താരത്തിന് ഈ സമീപനം ഭാവിയിൽ എത്രത്തോളം ഗുണം ചെയ്യുമെന്നത് കാത്തിരുന്ന് കാണാം.
