സമാധാനാന്തരീക്ഷം നിരന്തരം തകർക്കാൻ ശ്രമിച്ചുവെന്നും നിയമങ്ങൾ ലംഘിച്ചുവെന്നും ചൂണ്ടിക്കാട്ടി കൊക്രൊച്ച് ജനതാ പാർട്ടിയിലെ (സി.ജെ.പി) പതിനാല് പ്രവർത്തകർക്കെതിരെ ഡൽഹി പൊലീസ് കർശന നടപടി സ്വീകരിച്ചു. നിരോധനാജ്ഞ നിലനിൽക്കുന്ന ജന്തർ മന്തർ മേഖലയിൽ അതിക്രമിച്ചു കടന്നതായും ഔദ്യോഗിക കൃത്യനിർവഹണത്തിലുണ്ടായിരുന്ന പൊലീസുകാരെ തടസ്സപ്പെടുത്തിയതായും ആരോപിച്ചാണ് ഇവർക്കെതിരെ കേസുകൾ രജിസ്റ്റർ ചെയ്തിരിക്കുന്നത്. പ്രക്ഷോഭ സ്ഥലത്തേക്ക് ഇരച്ചുകയറി ദേശീയപതാക വീശിയ പ്രവർത്തകർ സമാധാനം കെടുത്താൻ സോഷ്യൽ മീഡിയ വഴിയും ബോധപൂർവ്വമായ ശ്രമങ്ങൾ നടത്തിയതായി പൊലീസ് വ്യക്തമാക്കി.
പ്രതിഷേധം നിരോധിച്ച സ്ഥലത്ത് സ്വകാര്യ വ്യക്തികളുടെ സ്ഥലം വഴി മതിൽ ചാടിക്കടന്നാണ് സി.ജെ.പി നേതാക്കളായ സൗരവ് ദാസ്, അശുതോഷ് റാങ്ക, അജിങ്ക്യ ഷിൻഡെ എന്നിവരടങ്ങുന്ന സംഘം ജന്തർ മന്തറിൽ എത്തിയത്. ചീഫ് ഇലക്ഷൻ കമ്മീഷണറുടെ രാജി ആവശ്യപ്പെട്ട് നടത്തിയ ഈ സമരത്തിനിടയിൽ ഡൽഹി പൊലീസിന്റെ ഔദ്യോഗിക നിർദ്ദേശങ്ങളെയും നിയമവ്യവസ്ഥയെയും ഇവർ തുടർച്ചയായി വെല്ലുവിളിച്ചതായി അധികൃതർ കുറ്റപ്പെടുത്തി. തുടർന്ന് സുരക്ഷാ മുൻകരുതലുകളുടെ ഭാഗമായി ഇവരെ കസ്റ്റഡിയിലെടുക്കുകയും സ്പെഷ്യൽ എക്സിക്യൂട്ടീവ് മജിസ്ട്രേറ്റിന് മുന്നിൽ ഹാജരാക്കുകയും ചെയ്തു.
കോടതിയിൽ ഹാജരാക്കിയ സി.ജെ.പി നേതാക്കളായ സൗരവ് ദാസിനെയും അശുതോഷ് റാങ്കയെയും അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിടുകയും തിഹാർ ജയിലിലേക്ക് അയക്കുകയും ചെയ്തു. കേസിൽ ഉൾപ്പെട്ട മറ്റൊരു അംഗമായ അജിങ്ക്യ ഷിൻഡെയെ ആറ് മാസത്തേക്ക് നല്ല നടപ്പ് പാലിക്കണമെന്ന വ്യവസ്ഥയോടെ വ്യക്തിഗത ബോണ്ടിന്റെ അടിസ്ഥാനത്തിൽ വിട്ടയച്ചു. അതേസമയം ജനാധിപത്യപരമായ പ്രതിഷേധങ്ങളെ അടിച്ചമർത്താനാണ് സർക്കാർ ശ്രമിക്കുന്നതെന്ന് പ്രതിപക്ഷ പാർട്ടികൾ കുറ്റപ്പെടുത്തി.
