ഓൾ ഫോർമാറ്റുകളിലും എക്കാലത്തെയും മികച്ച ബാറ്ററായി ഇന്ത്യൻ താരം വിരാട് കോഹ്‌ലിയെ തിരഞ്ഞെടുത്ത് മുൻ ഓസ്‌ട്രേലിയൻ നായകൻ മൈക്കിൾ ക്ലാര്ക്ക്. ‘ബിയോണ്ട് 23’ പോഡ്‌കാസ്റ്റിൽ സംസാരിക്കവെയാണ് കോഹ്‌ലിയുടെ അവിശ്വസനീയമായ പ്രകടനങ്ങളെയും സ്ഥിരതയെയും പ്രശംസിച്ച് ക്ലാര്ക്ക് രംഗത്തെത്തിയത്.
ടെസ്റ്റ്, ഏകദിനം, ടി20 എന്നീ ക്രിക്കറ്റിന്റെ മൂന്ന് ഫോർമാറ്റുകളിലും ഒരുപോലെ മികവ് പുലർത്താൻ കോഹ്‌ലിക്കുള്ള കഴിവ് മറ്റ് ബാറ്റർമാർക്കില്ലെന്ന് അദ്ദേഹം ചൂണ്ടിക്കാട്ടി. ഏതൊരു സാഹചര്യത്തിലും സമ്മർദ്ദങ്ങളെ അതിജീവിച്ച് റൺസ് അടിച്ചുകൂട്ടാനുള്ള കോഹ്‌ലിയുടെ മികവാണ് അദ്ദേഹത്തെ മറ്റുള്ളവരിൽ നിന്ന് വ്യത്യസ്തനാക്കുന്നത്. ചേസിംഗിൽ കാണിക്കുന്ന അസാധാരണമായ കൃത്യതയും കായികക്ഷമതയും അദ്ദേഹത്തിന്റെ ക്ലാസ് വ്യക്തമാക്കുന്നുവെന്നും, അതിനാൽ തന്നെ ക്രിക്കറ്റ് ചരിത്രത്തിലെ ഏറ്റവും വലിയ ഓൾ-ഫോർമാറ്റ് ബാറ്റർ കോഹ്‌ലി തന്നെയാണെന്നും ക്ലാര്ക്ക് അഭിപ്രായപ്പെട്ടു.
