ഐപിഎല്ലിന്റെ 2027 സീസണിൽ മുൻ ഇന്ത്യൻ നായകനും ചെന്നൈ സൂപ്പർ കിംഗ്സ് ഇതിഹാസവുമായ എം.എസ്. ധോണി വീണ്ടും പാഡണിയുമോ എന്ന കാര്യത്തിൽ ചർച്ചകൾ സജീവമാകുന്നു. ധോണിക്ക് ഇനിയും കളി തുടരാനാകുമെന്നും അന്തിമ തീരുമാനം അദ്ദേഹത്തിന്റേതാണെന്നും ചെന്നൈ സൂപ്പർ കിംഗ്സ് സിഇഒ കാശി വിശ്വനാഥൻ വ്യക്തമാക്കിയതോടെയാണ് ആരാധകരുടെ പ്രതീക്ഷകൾ വർദ്ധിച്ചത്.
ചെന്നൈയിൽ മാധ്യമങ്ങളോട് സംസാരിക്കവെ, ധോണി നഗരത്തിലെത്തുമ്പോൾ തന്റെ തീരുമാനം അറിയിക്കാറുണ്ടെന്ന് വ്യക്തമാക്കിയ സിഇഒ, ധോണി ഐപിഎല്ലിൽ തുടരാനാണ് സാധ്യതയെന്ന് അഭിപ്രായപ്പെട്ടു. എന്നാൽ ഇതൊരു ഔദ്യോഗിക സ്ഥിരീകരണമല്ലെന്നും കാര്യങ്ങൾ വ്യക്തമാകാൻ കാത്തിരിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.
45 വയസ്സ് പിന്നിട്ട ധോണിയുടെ കായികക്ഷമതയും ഐപിഎൽ ഭാവിയും കഴിഞ്ഞ കുറച്ചു സീസണുകളായി ക്രിക്കറ്റ് ലോകത്ത് വലിയ ചർച്ചാവിഷയമാണ്. 2026 ലെ ഐപിഎൽ സീസണിൽ ധോണി ഒരു മത്സരത്തിൽ പോലും ഇലവനിലോ ഇംപാക്ട് പ്ലെയറായോ കളത്തിലിറങ്ങിയിരുന്നില്ല. ടീമിനൊപ്പം അദ്ദേഹം മൈതാനത്തുണ്ടായിരുന്നെങ്കിലും മത്സരങ്ങളിൽ പങ്കെടുക്കാതിരുന്നത് വിരമിക്കൽ അഭ്യൂഹങ്ങൾക്ക് ആക്കം കൂട്ടിയിരുന്നു. ഇതിനിടെ, അടുത്ത സീസണിലും ധോണി കളിക്കളത്തിലേക്ക് തിരിച്ചെത്തണമെന്ന് മുൻ ചെന്നൈ താരം സുരേഷ് റെയ്നയും ആവശ്യപ്പെട്ടിട്ടുണ്ട്.
ചേപ്പോക്കിൽ നടന്ന പരേഡിനിടെ 2027 സീസണിൽ കളിക്കാൻ താൻ ധോണിയോട് ആവശ്യപ്പെട്ടതായി റെയ്ന വെളിപ്പെടുത്തി. മാനേജ്‌മെന്റിന്റെയും മുൻ സഹതാരങ്ങളുടെയും ഭാഗത്തുനിന്ന് അനുകൂലമായ പ്രതികരണങ്ങൾ വരുന്നുണ്ടെങ്കിലും, ധോണി സ്വയം മനസ്സ് തുറക്കുന്നതുവരെ അദ്ദേഹത്തിന്റെ തിരിച്ചുവരവ് അനിശ്ചിതത്വത്തിൽ തന്നെ തുടരും.
