ഇന്ത്യൻ ടീമിൽ സ്റ്റാർ ഓൾറൗണ്ടർ ഹാർദിക് പാണ്ഡ്യയുടെ യഥാർത്ഥ പിൻഗാമിയായി ഉയർത്തിക്കാട്ടപ്പെടുന്ന ആന്ധ്രാപ്രദേശ് താരം നിതീഷ് കുമാർ റെഡ്ഡിയെക്കുറിച്ച് വിലയിരുത്തലുമായി മുൻ കോച്ചുമാർ. പരിക്കുകൾ കാരണം ഹാർദിക് ഇടയ്ക്കിടെ പുറത്താകുമ്പോൾ നിതീഷിനെ 2027 ഏകദിന ലോകകപ്പ് ലക്ഷ്യമിട്ട് വളർത്തിയെടുക്കാനാണ് ടീം മാനേജ്‌മെന്റ് ശ്രമിക്കുന്നത്. മൂന്ന് ഫോർമാറ്റുകളിലുമായി ഇന്ത്യയ്ക്കായി 27 മത്സരങ്ങളിൽ നിന്ന് ഒരു സെഞ്ചുറിയും രണ്ട് അർദ്ധസെഞ്ചുറിയുമടക്കം 658 റൺസും 21 വിക്കറ്റുകളും താരം നേടിയിട്ടുണ്ടെങ്കിലും, ഫോമിലെ സ്ഥിരതയില്ലായ്മ നിതീഷിന് തിരിച്ചടിയാകുന്നുണ്ട്.
നിതീഷ് തന്റെ യഥാർത്ഥ ശേഷിക്കൊത്ത് നിലവിൽ പ്രകടനം പുറത്തെടുക്കുന്നില്ലെന്നും, എന്നാൽ ബാറ്റിംഗിൽ കൂടുതൽ തിളങ്ങാൻ കഴിവുള്ള താരമായതിനാൽ ലോകകപ്പിന് മുൻപ് അദ്ദേഹം മികച്ച രീതിയിൽ തിരിച്ചെത്തുമെന്നും മുൻ ഫീൽഡിംഗ് കോച്ച് ആർ. ശ്രീധർ അഭിപ്രായപ്പെട്ടു. ഹാർദിക് പൂർണ്ണ കായികക്ഷമതയോടെ തിരിച്ചെത്തുകയോ നിതീഷ് കൂടുതൽ മെച്ചപ്പെടുകയോ ചെയ്യുന്നത് ലോകകപ്പിൽ ഇന്ത്യയ്ക്ക് ഗുണം ചെയ്യുമെന്നും ശ്രീധർ കൂട്ടിച്ചേർത്തു
അതേസമയം, വരാനിരിക്കുന്ന ന്യൂസിലൻഡ് പര്യടനത്തിൽ ഹാർദിക്കിന്റെ അഭാവം ടീമിന് നഷ്ടമാണെങ്കിലും നിതീഷ് കുമാർ റെഡ്ഡിക്ക് ആ വിടവ് നികത്താൻ കഴിയുമെന്ന് മുൻ ബൗളിംഗ് കോച്ച് ഭരത് അരുൺ പറഞ്ഞു. അന്താരാഷ്ട്ര തലത്തിൽ തിളങ്ങാൻ ആവശ്യമായ പേസ് നിതീഷിനുണ്ടെന്നും, എന്നാൽ സമ്മർദ്ദഘട്ടങ്ങളിൽ തന്ത്രങ്ങൾ കൃത്യമായി നടപ്പിലാക്കാനുള്ള ശേഷിയാണ് താരത്തിന്റെ ഭാവി നിർണ്ണയിക്കുകയെന്നും അരുൺ വ്യക്തമാക്കി.
