ഐപിഎല്ലിലെ ഏറ്റവും ഉയർന്ന വിക്കറ്റ് വേട്ടക്കാരനായ ഇന്ത്യൻ ലെഗ് സ്പിന്നർ യുസ്വേന്ദ്ര ചഹാൽ തന്റെ വ്യക്തിജീവിതത്തിൽ നേരിട്ട കടുത്ത മാനസിക അസ്വസ്ഥതകളെക്കുറിച്ചും മദ്യപാന ശീലത്തിൽ നിന്നുള്ള മോചനത്തെക്കുറിച്ചും തുറന്നുപറയുന്നു. മുൻ ഇന്ത്യൻ താരം ആകാശ് ചോപ്രയുടെ പോഡ്കാസ്റ്റിലാണ് ചഹാൽ തനിക്ക് നേരിടേണ്ടിവന്ന കടുത്ത പ്രതിസന്ധികളെക്കുറിച്ച് മനസ്സ് തുറന്നത്.
വിവാഹമോചനത്തിന് ശേഷം ജീവിതം തികച്ചും താളംതെറ്റിയ അവസ്ഥയിലായിരുന്നുവെന്നും മാനസിക സമനില വീണ്ടെടുക്കാൻ കഴിയാതെ പോയതോടെ മദ്യപാനം എല്ലാ അതിരുകളും ലംഘിച്ചിരുന്നുവെന്നും താരം വെളിപ്പെടുത്തി. ഇത് തന്റെ ക്രിക്കറ്റ് കരിയറിനെ ബാധിക്കുമെന്ന് തിരിച്ചറിഞ്ഞതോടെയാണ് കൗണ്ടി ക്രിക്കറ്റിന് ശേഷം 26 ദിവസം പുനരധിവാസ കേന്ദ്രത്തിൽ (Rehab Center) താമസിച്ച് ചികിത്സ തേടിയതെന്നും താരം പറഞ്ഞു. കടുത്ത വിഷാദവും ഉത്കണ്ഠയും (Anxiety) പാനിക് അറ്റാക്കുകളും അനുഭവപ്പെട്ടിരുന്ന കാലത്ത് മുഖത്തിന്റെ പേശികൾ വലിഞ്ഞുമുറുകി സംസാരിക്കാൻ പോലും കഴിയാത്ത അവസ്ഥയുണ്ടായിരുന്നതായും ചഹാൽ ഓർത്തെടുത്തു.
സോഷ്യൽ മീഡിയയിലൂടെയുള്ള നിരന്തരമായ വ്യക്തിപരമായ കടന്നാക്രമണങ്ങളും വിമർശനങ്ങളും അവസ്ഥ കൂടുതൽ വഷളാക്കിയെങ്കിലും കുടുംബത്തിന്റെയും അടുത്ത സുഹൃത്തുക്കളുടെയും പിന്തുണയോടെയാണ് താൻ ജീവിതത്തിലേക്ക് തിരിച്ചെത്തിയത്. ഈ കടുത്ത തിരിച്ചടികളിൽ നിന്ന് പൂർണ്ണമായി മുക്തനായി പുതിയ ഊർജ്ജത്തോടെ കളിയിലേക്ക് മടങ്ങിയെത്തിയ താരം, നിലവിൽ പഞ്ചാബ് കിങ്സിന് വേണ്ടി ഐപിഎല്ലിൽ മികച്ച പ്രകടനമാണ് പുറത്തെടുക്കുന്നത്.
