ന്യൂഡൽഹി: രാഷ്ട്രീയ കേരളത്തെ ഉലച്ച് സിഎംആർഎൽ-എക്‌സാലോജിക് സാമ്പത്തിക ഇടപാട് കേസിൽ നിർണായക നീക്കവുമായി എൻഫോഴ്സ്മെന്റ് ഡയറക്ടറേറ്റ് (ഇ.ഡി). കേസിൽ അന്വേഷണം ശക്തമാക്കുന്നതിന്റെ ഭാഗമായി മുതിർന്ന നേതാവും മുൻ മുഖ്യമന്ത്രിയുമായ പിണറായി വിജയന് ഇ.ഡി സമൻസ് അയച്ചു. അടുത്തയാഴ്ച കൊച്ചിയിലെ ഇ.ഡി ഓഫീസിൽ ചോദ്യം ചെയ്യലിനായി ഹാജരാകാനാണ് സമൻസിൽ നിർദേശിച്ചിരിക്കുന്നത്.
വിജിലൻസ് രജിസ്റ്റർ ചെയ്ത എഫ്.ഐ.ആറിന്റെ ചുവടുപിടിച്ച് കള്ളപ്പണം വെളുപ്പിക്കൽ നിരോധന നിയമപ്രകാരം (പി.എം.എൽ.എ) ഇ.ഡി രണ്ട് ഇ.സി.ഐ.ആറുകൾ (Enforcement Case Information Report) രജിസ്റ്റർ ചെയ്ത് ദിവസങ്ങൾക്കകമാണ് സമൻസ് നൽകിയിരിക്കുന്നത്. മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻ മന്ത്രി പി.എ. മുഹമ്മദ് റിയാസ് എന്നിവരുൾപ്പെട്ട സാമ്പത്തിക ഇടപാടുകളിൽ വിശദമായ ചോദ്യം ചെയ്യൽ അനിവാര്യമാണെന്ന വിലയിരുത്തലിലാണ് ഇ.ഡിയുടെ ഈ നീക്കം.
സിഎംആർഎൽ കമ്പനിയിൽ നിന്ന് എക്‌സാലോജിക് സൊല്യൂഷൻസ് വഴി കോടികളുടെ കൈക്കൂലിയും വ്യാജ പണമിടപാടുകളും നടത്തിയെന്ന ആരോപണത്തിലാണ് പ്രധാന അന്വേഷണം നടക്കുന്നത്. എൻഫോഴ്സ്മെന്റ് ഡയറക്ടറേറ്റ് നൽകിയ വിവരങ്ങളുടെ അടിസ്ഥാനത്തിൽ കേസിൽ അന്വേഷണം തുടരാമെന്ന് ഹൈക്കോടതി വ്യക്തമാക്കിയതിന് പിന്നാലെയാണ് വിജിലൻസും ഇ.ഡിയും ഒരുപോലെ അന്വേഷണ നടപടികൾ വേഗത്തിലാക്കിയത്. സമൻസ് ലഭിച്ചതോടെ പ്രതിരോധത്തിലായ സി.പി.എം വരുംദിവസങ്ങളിൽ സ്വീകരിക്കേണ്ട നിയമപരവും രാഷ്ട്രീയവുമായ നിലപാടുകളെക്കുറിച്ച് ചർച്ച തുടങ്ങിയിട്ടുണ്ട്.
