ന്യൂസിലാൻഡിനെതിരായ രണ്ടാം ട്വന്റി-20 മത്സരത്തിൽ മൂന്നാം നമ്പറിലിറങ്ങി നിരാശപ്പെടുത്തിയ 15-കാരൻ വൈഭവ് സൂര്യവംശിയെ പിന്തുണച്ച് മുൻ ഇന്ത്യൻ താരം മുരളി കാർത്തിക്. പരിക്കേറ്റ ഇഷാൻ കിഷന് പകരം ആദ്യമായി പ്ലെയിങ് ഇലവനിൽ ഇടം നേടിയ വൈഭവ് എട്ട് പന്തിൽ നാല് റൺസ് മാത്രമെടുത്ത് പുറത്തായിരുന്നു. എന്നാൽ ഈ മോശം പ്രകടനത്തിൽ യുവതാരത്തെ കുറ്റപ്പെടുത്താനാവില്ലെന്നും വൈഭവിനെ ഓപ്പണറാക്കി മുതിർന്ന താരമായ സഞ്ജു സാംസൺ മൂന്നാം നമ്പറിലേക്ക് ഇറങ്ങണമായിരുന്നുവെന്നും കാർത്തിക് നിരീക്ഷിച്ചു. മത്സരശേഷം സോണി സ്‌പോർട്‌സ് നെറ്റ്‌വർക്കിൽ പ്രതികരിക്കവേയാണ് അദ്ദേഹം ടീം മാനേജ്‌മെന്റിന്റെ തീരുമാനത്തെ വിമർശിച്ചത്.
വൈഭവ് സൂര്യവംശി തന്റെ കരിയറിലുടനീളം ഓപ്പണറായി മാത്രം കളിച്ച് പരിചയമുള്ള താരമാണെന്നും അങ്ങനെയൊരു തുടക്കക്കാരനെ അപരിചിതമായ മധ്യനിരയിൽ കളിപ്പിച്ചത് ശരിയായ തീരുമാനമല്ലെന്നും കാർത്തിക് ചൂണ്ടിക്കാട്ടി. വൈഭവും അഭിഷേക് ശർമ്മയും സമാനമായ ബാറ്റിങ് ശൈലിയുള്ള ഓപ്പണർമാരാണ്.
എന്നാൽ സഞ്ജു സാംസൺ ഏത് ബാറ്റിങ് പൊസിഷനിലും കളിക്കാൻ ശേഷിയുള്ള പരിചയസമ്പന്നനായ താരമാണ്. ഇത്തരമൊരു സാഹചര്യത്തിൽ സഞ്ജുവാണ് തന്ത്രപരമായ വഴക്കത്തോടെ മൂന്നാം നമ്പറിലേക്ക് മാറേണ്ടിയിരുന്നത്. ഇനി മധ്യനിരയിൽ കളിക്കാനായിരുന്നെങ്കിൽ വൈഭവിന് പകരം ശിവം ദുബെയെ കളിപ്പിക്കുന്നതായിരുന്നു കൂടുതൽ യുക്തിസഹമെന്നും വൈഭവിന്റെ പരമാവധി പ്രകടനം പുറത്തെടുക്കാൻ താരത്തിന് ഓപ്പണിങ് തന്നെ നൽകണമെന്നും കാർത്തിക് കൂട്ടിച്ചേർത്തു.
