കോൺഗ്രസ് സ്ഥാപിച്ച ബാങ്കുകൾ മോദി സർക്കാർ വിറ്റഴിക്കുകയാണെന്ന രാഹുൽ ഗാന്ധിയുടെ ആരോപണത്തിന് ശക്തമായ മറുപടിയുമായി കേന്ദ്ര ധനമന്ത്രി നിർമലാ സീതാരാമൻ രംഗത്ത്. ബാങ്കുകളെയും ധനകാര്യ സ്ഥാപനങ്ങളെയും കോൺഗ്രസ് മുൻകാലങ്ങളിൽ സ്വന്തം ആവശ്യങ്ങൾക്കായി ദുരുപയോഗം ചെയ്തിട്ടുണ്ടെന്ന് കുറ്റപ്പെടുത്തിയ മന്ത്രി, ഇതുമായി ബന്ധപ്പെട്ട ചില ചരിത്രപരമായ ഉദാഹരണങ്ങളും എക്സിലൂടെ പങ്കുവെച്ചു. ഐഡിബിഐ ബാങ്ക് ഓഹരി വിറ്റഴിക്കലുമായി ബന്ധപ്പെട്ട് ജീവനക്കാർക്ക് ഐക്യദാർഢ്യം പ്രഖ്യാപിച്ച് രാഹുൽ ഗാന്ധി എഴുതിയ തുറന്ന കത്തിലെ ആരോപണങ്ങൾക്ക് മറുപടിയായാണ് നിർമലയുടെ ഈ പ്രതികരണം ഉണ്ടായിരിക്കുന്നത്.
കോൺഗ്രസ് ഭരണകാലത്ത് മാനദണ്ഡങ്ങൾ ലംഘിച്ച് തങ്ങളുടെ ഇഷ്ടാനുസരണം വായ്പകൾ അനുവദിക്കാൻ ബാങ്ക് ജീവനക്കാരുടെ മേൽ കടുത്ത രാഷ്ട്രീയ സമ്മർദ്ദമുണ്ടായിരുന്നുവെന്ന് മന്ത്രി ആരോപിച്ചു. 1957-ൽ കോൺഗ്രസ് നേതാക്കളുടെ സ്വാധീനം മൂലം ഹരിദാസ് മുന്ദ്രയ്ക്ക് എൽ.ഐ.സിയിൽ നിന്ന് പണം ലഭിച്ചതും, 1976-ൽ സഞ്ജയ് ഗാന്ധിയുമായി ബന്ധമുള്ള കമ്പനിക്ക് വായ്പാ വ്യവസ്ഥകളിൽ ഇളവ് നൽകാൻ തയ്യാറാകാത്തതിനെത്തുടർന്ന് എസ്.ബി.ഐ ചെയർമാൻ ആർ.കെ. തൽവാറിനെ ഇന്ദിരാഗാന്ധി സർക്കാർ പുറത്താക്കിയതും അവർ ചൂണ്ടിക്കാണിച്ചു. കൂടാതെ, മാരുതിക്ക് വായ്പ നൽകുന്നതുമായി ബന്ധപ്പെട്ട് സഞ്ജയ് ഗാന്ധി സെൻട്രൽ ബാങ്ക് ഓഫ് ഇന്ത്യയുടെമേൽ സമ്മർദ്ദം ചെലുത്തിയെന്നും, 1980-കളിൽ ധനകാര്യ സഹമന്ത്രിയായിരുന്ന ബി. ജനാർദ്ദന പൂജാരിയും പിന്നീട് യു.പി.എ മന്ത്രിയായിരുന്ന പവൻ കുമാർ ബൻസാലും സ്വന്തം കുടുംബവുമായി ബന്ധമുള്ള ബിസിനസ്സുകൾക്കും മറ്റും വായ്പ നൽകാൻ ബാങ്കുകളുടെമേൽ സമ്മർദ്ദം ചെലുത്തിയെന്നും നിർമല വ്യക്തമാക്കി.
തുടർന്ന് ഐഡിബിഐ ബാങ്കിന്റെ ഓഹരി വിറ്റഴിക്കലിനെ പൂർണ്ണമായും ന്യായീകരിച്ച ധനമന്ത്രി, വളരെ മോശമായ അവസ്ഥയിലാണ് ഈ ബാങ്ക് എൻ.ഡി.എ സർക്കാരിന് കൈമാറപ്പെട്ടതെന്ന് വ്യക്തമാക്കി. കോൺഗ്രസ് നേതാക്കളുമായി അടുത്ത ബന്ധമുള്ള വീഡിയോക്കോൺ, വിൻസം, എബിജി ഷിപ്പ്യാർഡ്, കിങ്ഫിഷർ തുടങ്ങിയ വൻകിട ബിസിനസ് ഗ്രൂപ്പുകൾക്ക് വായ്പ നൽകാൻ ഐഡിബിഐ നിർബന്ധിതരായെന്നും, പിന്നീട് അവ തിരിച്ചടയ്ക്കാത്ത കിട്ടാക്കടങ്ങളായി മാറി ബാങ്കിന് വലിയ നഷ്ടമുണ്ടാക്കിയെന്നും അവർ കുറ്റപ്പെടുത്തി. ഈ പ്രതിസന്ധി ഘട്ടത്തിൽ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സർക്കാർ പ്രൊഫഷണലിസവും വിവേകപൂർണ്ണമായ സമീപനവും സ്വീകരിച്ച് 25,000 കോടിയിലധികം രൂപയുടെ മൂലധന നിക്ഷേപം നടത്തിയാണ് ഐഡിബിഐ ബാങ്കിനെ പുനരുജ്ജീവിപ്പിച്ചതെന്നും നിർമലാ സീതാരാമൻ കൂട്ടിച്ചേർത്തു. ബാങ്കിന്റെ തന്ത്രപരമായ പുനഃസംഘടനയിൽ എല്ലാ നിയമപരമായ നടപടിക്രമങ്ങളും കൃത്യമായി പാലിച്ചിട്ടുണ്ടെന്നും അവർ വ്യക്തമാക്കിയിട്ടുണ്ട്.
