ഡല്ഹി: റിസര്വ് ബാങ്ക് ഗവര്ണര് രഘുറാം രാജനെ സ്ഥാനത്ത് നിന്ന് നീക്കണമെന്നാവശ്യപ്പെട്ട് ബി.ജെ.പി നേതാവും രാജ്യസഭാംഗവുമായ സുബ്രഹ്മണ്യന് സ്വാമി പ്രധാനമന്ത്രി നരേന്ദ്ര മോദിക്ക് കത്തെഴുതി.
രഘുറാം രാജന്റെ കാലാവധി കഴിയുന്നതിന് മുമ്പെ അദ്ദേഹത്തെ ഗവര്ണര് സ്ഥാനത്ത് നിന്ന് നീക്കണമെന്നാണ് കത്തിലൂടെ ആവശ്യപ്പെട്ടത്. ഈ വര്ഷം സെപ്തംബറിലാണ് രഘുറാം രാജന്റെ കാലാവധി അവസാനിക്കുന്നത്.
ഗവര്ണര് ഇന്ത്യന് സാമ്പത്തിക വളര്ച്ചയെ തടയാന് ശ്രമിക്കുന്നുവെന്ന് സ്വാമി കത്തില് ആരോപിക്കുന്നു. റിസര്വ് ബാങ്ക് ഗവര്ണറായി ചുമലയേറ്റതിന് ശേഷം അദ്ദേഹം പൂര്ണമായും ഒരു ഇന്ത്യക്കാരന്റെ മനസികാവസ്ഥയിലല്ല പ്രവര്ത്തിക്കുന്നതെന്നും തിങ്കളാഴ്ച സുബ്രഹ്മണ്യന് സ്വാമി പ്രധാനമന്ത്രിക്കെഴുതിയ കത്തില് കുറ്റപ്പെടുത്തുന്നു.
രഘുറാം രാജന്റെ തീരുമാനങ്ങള് ചെറുകിട ഇടത്തരം വ്യാപാര സംരഭങ്ങള്ക്ക് തിരിച്ചടിയാണ്,. ഇത് രാജ്യത്തെ തൊഴിലില്ലായ്മയിലേക്ക് നയിക്കും- സുബ്രഹ്മണ്യന് സ്വാമി കത്തില് കുറ്റപ്പെടുത്തുന്നു. രഘുറാം രാജനെ ചിക്കാഗോയിലേക്ക് തിരിച്ചയക്കണമെന്നാവശ്യപ്പെട്ട് കൊണ്ട് കഴിഞ്ഞയാഴ്ചയും സുബ്രഹ്മണ്യന് സ്വാമി പ്രസ്താവനയിറക്കിയിരുന്നു. ഇതിന് പിന്നാലെയാണ് പ്രധാനമന്ത്രിക്ക് കത്തെഴുതിയത്.
യു.പി.എ സര്ക്കാരാണ് രഘുറാം രാജനെ റിസര്വ് ബാങ്ക് ഗവര്ണര് സ്ഥാനത്തേക്ക് നിയോഗിച്ചിരുന്നത്.എന്നാല് സുബ്രഹ്മണ്യന് സ്വാമിയുടെ ആരോപണങ്ങള്ക്കെതിരെ പ്രതികരിക്കാന് രഘുറാം രാജന് തയ്യാറായിട്ടില്ല.
Discussion about this post