തിരുവനന്തപുരം: സാമ്പത്തിക അച്ചടക്കം നടപ്പാക്കുമെന്ന് എല്ഡിഎഫ് സര്ക്കാരിന്റെ ആദ്യ നയപ്രഖ്യാപനത്തില് ഗവര്ണര് പി. സദാശിവം. ജനപിന്തുണയോടെയായിരിക്കും തീരുമാനങ്ങള് നടപ്പാക്കുക. തദ്ദേശ സ്ഥാപനങ്ങളില് സോഷ്യല് ഓഡിറ്റ് നിര്ബന്ധമാക്കുമെന്നും നയപ്രഖ്യാപനത്തില് പറയുന്നു. സ്ത്രീകളുടെയും കുട്ടികളുടെയും ക്ഷേമത്തിനായി പുതിയ വകുപ്പ് രൂപീകരിക്കും. ന്യൂനപക്ഷങ്ങള് നേരിടുന്ന പ്രശ്നങ്ങള്ക്ക് മുന്ഗണന നല്കും. ജില്ലാ, ഉപജില്ലാ തലങ്ങളില് ജനകീയ സമ്പര്ക്ക പരിപാടി നടപ്പാക്കുമെന്ന് പറയുന്ന നയരേഖ അവിടെവച്ചുതന്നെ പ്രശ്നങ്ങള്ക്കു പരിഹാരം കാണുമെന്നും പറയുന്നു.
സിവില് സര്വീസിലേക്ക് യുവാക്കളെ ആകര്ഷിക്കാന് പദ്ധതി തയ്യാറാക്കും. അഞ്ചുവര്ഷം 25 ലക്ഷം തൊഴിലവസരങ്ങളുണ്ടാക്കും. ഐടി, ടൂറിസം മേഖലകളില് 10 ലക്ഷം പേര്ക്ക് തൊഴില് നല്കും. 15 ലക്ഷം പേര്ക്ക് കൃഷി, വ്യവസായ മേഖലഖളില് തൊഴില് അവസരം സൃഷ്ടിക്കും. ദേശീയപാതയ്ക്കായി ഭൂമിയേറ്റെടുക്കുമ്പോള് വിപണവില നല്കി പുനരധിവാസം ഉറപ്പാക്കും. പട്ടിണി രഹിത സംസ്ഥാനം ലക്ഷ്യം.
തിരുവനന്തപുരം, കോഴിക്കോട് വിമാനത്താവളങ്ങള് വിപുലീകരിക്കും. പരിസ്ഥിതിക്ക് നാശമുണ്ടാക്കാതെ സ്വാകാര്യ പദ്ധതികള് തുടങ്ങും. 1500 പുതിയ സ്റ്റാര്ട്ട് അപ്പുകള്. പഞ്ചവത്സര പദ്ധതി ആസൂത്രിതവും ശാസ്ത്രീയവുമാക്കുമെന്നും ഗ്യാസ് പൈപ്പ് ലൈന് പദ്ധതി നടപ്പാക്കാന് സംസ്ഥാനസര്ക്കാര് പ്രതിജ്ഞാബദ്ധമാണെന്നും നയപ്രഖ്യാപനത്തില് പറയുന്നു.
ജൂലൈ 19 വരെ സമ്മേളനം തുടരും. കണ്ണൂരില് ദളിത് പെണ്കുട്ടിക്കു നേരെയുണ്ടായ പോലീസ് അതിക്രമവും സംസ്ഥാനത്തുടനീളമുള്ള സിപിഎം അക്രമങ്ങളും പ്രതിപക്ഷം നിയമസഭയില് ഉന്നയിക്കും. 27നു മുന് സ്പീക്കര് ടി.എസ്. ജോണിനു ചരമോപചാരം അര്പ്പിക്കും. 28 മുതല് 30 വരെ നയപ്രഖ്യാപന പ്രസംഗത്തിനു നന്ദി പ്രമേയ ചര്ച്ച നടക്കും. ഈദുല് ഫിത്തറുമായി ബന്ധപ്പെട്ടു ജൂലൈ ഒന്നു മുതല് ഏഴു വരെ നിയമസഭയ്ക്ക് അവധിയായിരിക്കും.
എട്ടിനു രാവിലെ ഒന്പതിനു ബജറ്റും വോട്ട് ഓണ് അക്കൗണ്ടും ധനമന്ത്രി തോമസ് ഐസക് അവതരിപ്പിക്കും. 11 മുതല് 13 വരെ ബജറ്റിന്മേല് പൊതുചര്ച്ച നടക്കും. 14നു വോട്ട് ഓണ് അക്കൗണ്ട് ചര്ച്ചയും വോട്ടെടുപ്പുമുണ്ടാകും. 15ന് അനൗദ്യോഗിക ബില്ലുകളും 18 നും 19 നും സര്ക്കാര് കാര്യങ്ങളുമാണു സഭയിലെത്തുക. ഡെപ്യൂട്ടി സ്പീക്കര് തെരഞ്ഞെടുപ്പും സമ്മേളന കാലത്തുണ്ടായേക്കും. സിപിഐയിലെ വി. ശശിയാണ് എല്ഡിഎഫിന്റെ ഡെപ്യുട്ടി സ്പീക്കര് സ്ഥാനാര്ഥി.
Discussion about this post