കശ്മീര്: കശ്മീര് അതിര്ത്തിയില് വീണ്ടും യാതൊരു പ്രകോപനവുമില്ലാതെ പാക്ക് വെടിവെയ്പ്. കശ്മീരിലെ ഹിരാനഗര് സെക്ടറിലെ സൈനിക പോസ്റ്റുകള്ക്കു നേരെയാണ് പാക്കിസ്ഥാന് വെടിയുതിര്ത്തത്. വെടിവയ്പ്പില് ബിഎസ്എഫ് പാക്ക് റെയ്ഞ്ചറെ വധിച്ചു. ആക്രമണത്തില് ഒരു ബിഎസ്എഫ് ജവാന് പരിക്കേറ്റതായും സൈനിക വൃത്തങ്ങള് അറിയിച്ചു. ഹിരാനഗറിലെ ബോബിയയില് ഇന്നുരാവിലെ 9.35നാണ് ഏറ്റുമുട്ടല് ഉണ്ടായത്.
തോക്കുകളും ഓട്ടോമാറ്റിക് ആയുധങ്ങളും ഉപയോഗിച്ചായിരുന്നു പാക്ക് സൈന്യം ആക്രമണം നടത്തിയതെന്ന് ബിഎസ്എഫ് ജമ്മു ഇന്സ്പെക്ടര് ജനറല് ഡി.കെ.ഉപാധ്യായ പറഞ്ഞു. ഇന്ത്യന് സൈന്യം ശക്തമായി തിരിച്ചടിച്ചു.
യാതൊരു പ്രകോപനവും കൂടാതെ പാക്ക് റേഞ്ചേഴ്സ് ഇന്ത്യന് സൈനിക പോസ്റ്റുകള്ക്കുനേരെ വെടിയുതിര്ക്കുകയായിരുന്നു. കോണ്സ്റ്റബിള് ഗുര്ണാം സിങിനാണ് പരുക്കേറ്റത്. ഇയാളെ ആശുപത്രിയില് പ്രവേശിപ്പിച്ചു.
രജൗറിയില് കഴിഞ്ഞ രാത്രിയില് പാക്ക് സൈന്യം വെടിനിര്ത്തല് കരാര് ലംഘിച്ച് ഷെല്ലാക്രമണം നടത്തിയിരുന്നു. കഴിഞ്ഞ 15 മണിക്കൂറായി ഇരു പക്ഷത്തേക്കും ശക്തമായ വെടിവയ്പ്പ് നടക്കുന്നതായാണ് റിപ്പോര്ട്ട്. നിയന്ത്രണരേഖ കടന്ന് ഇന്ത്യ നടത്തിയ മിന്നലാക്രമണത്തിനുശേഷം 32 തവണ പാക്കിസ്ഥാന് വെടിനിര്ത്തല് കരാര് ലംഘിച്ചതായാണ് കണക്ക്.
Discussion about this post