മുംബൈ: ടൈംസ് നൗ ചാനലില്‍ നിന്ന രാജി വെച്ച അര്‍ണാബ് ഗോസ്വാമി ചാനലില്‍ നടത്തിയ വിടവാങ്ങല്‍ പ്രസംഗത്തിന്റെ വീഡിയോ പുറത്ത്. മൂന്ന് മിനുറ്റ് പത്ത് സെക്കന്റാണ് വീഡിയോയുടെ ദൈര്‍ഘ്യം. ‘കളി തുടങ്ങിയിട്ടേയുള്ളു’ (The Game has Just Begun) എന്നാണ് സഹപ്രവര്‍ത്തകരോട് അര്‍ണാബ് പറയുന്നത്.
ഇന്നലെയാണ് അര്‍ണബിന്റെ വിടവാങ്ങല്‍ പ്രസംഗത്തിന്റെ വീഡിയോ ഇന്റര്‍നെറ്റിലൂടെ പുറത്തു വന്നത്. പ്രൈം ടൈം ചര്‍ച്ചകളിലെ തന്റെ ആക്രമണ ശൈലിയിലൂടെ പ്രസിദ്ധനാണ് അര്‍ണാബ് ഗോസ്വാമി. സ്വതന്ത്ര മാധ്യമങ്ങളിലുള്ള നിങ്ങളുടെ വിശ്വാസം ഒരിക്കലും നഷ്ടപ്പെടരുത് എന്നാണ് അര്‍ണാബ് തന്റെ സഹപ്രവര്‍ത്തകരോട് പറഞ്ഞത്. ‘സ്വതന്ത്ര മാധ്യമപ്രവര്‍ത്തനം ആര്‍ക്കും നമ്മളെ പഠിപ്പിക്കാനാകില്ല. എനിക്ക് അത് ചെയ്യാന്‍ കഴിഞ്ഞത് നിങ്ങള്‍ കാരണമാണ്.’ തന്റെ പ്രസംഗത്തിനിടെ വികാര നിര്‍ഭരനായി അര്‍ണാബ് പറഞ്ഞു. തന്റെ സഹപ്രവര്‍ത്തകരോട് പലപ്പോഴും ദേഷ്യപ്പെട്ട് സംസാരിക്കേണ്ടി വന്നതിന് അവരോട് അര്‍ണാബ് മാപ്പ് ചോദിച്ചു. ‘നമ്മുടെ ചാനല്‍ ഒന്നാമതെത്തണം. അതിനു വേണ്ടി മാത്രമാണ് ഞാന്‍ അങ്ങനെ ചെയ്യുന്നത്.’ അര്‍ണാബ് തന്റെ സഹപ്രവര്‍ത്തകരോടായി പറഞ്ഞു.
ന്യൂസ് അവര്‍ ഡിബേറ്റിലെ തീപിടിച്ച ചര്‍ച്ചകള്‍ അവതരിപ്പിച്ചുകൊണ്ടാണ് അര്‍ണാബ് വാര്‍ത്തകളില്‍ നിറയുന്നത്. പത്ത് വര്‍ഷത്തെ സേവനത്തിനു ശേഷമാണ് അര്‍ണാബ് ഗോസ്വാമി ടൈംസ് നൗ വിടുന്നത്.
കൊല്‍ക്കത്തയിലെ ‘ദി ടെലിഗ്രാഫി’ല്‍ ചേര്‍ന്നുകൊണ്ടാണ് അര്‍ണാബ് തന്റെ മാധ്യമപ്രവര്‍ത്തനത്തിലേക്ക് പ്രവേശിപ്പിക്കുന്നത്. പിന്നീട് 1995-ല്‍ എന്‍ഡിടിവിയില്‍ ചേര്‍ന്നു. 2006ലാണ് അര്‍ണാബ് ഗോസ്വാമി ടൈംസ് നൗവില്‍ ചേര്‍ന്നത്. ന്യൂസ് അവര്‍ ഡിബേറ്റിന്റെ അവതാരകനായതോടെ ചാനലിന്റെ മുഖം തന്നെ അര്‍ണാബ് ഗോസ്വാമിയായി. അതി ദേശീയവാദി എന്ന ലേബലിലാണ് അടുത്തിടെ മുതല്‍ അര്‍ണാബ് ഗോസ്വാമി പ്രസിദ്ധിയാര്‍ജിച്ചത്. ചാനല്‍ ചര്‍ച്ചയില്‍ പങ്കെടുക്കുമ്പോള്‍ തന്റെ നിലപാടിനെതിരെ ഉറക്കെ സംസാരിക്കുന്നവരെ ഇറക്കി വിടാനും മടി കാണിക്കാത്തയാളായിരുന്നു അര്‍ണാബ്.
അര്‍ണാബ് ഗോസ്വാമിയുടെ വിടവാങ്ങല്‍ പ്രസംഗം:
https://www.youtube.com/watch?v=YIshkWtXfk0
Discussion about this post