തിരുവനന്തപുരം: ഗ്രാമീണരെ കറന്‍സിരഹിത ഇടപാട് പഠിപ്പിച്ചാല്‍ സമ്മാനം വാഗ്ദാനം ചെയ്ത് കേന്ദ്രസര്‍ക്കാര്‍. 40 പേര്‍ക്ക് പരിശീലനം നല്‍കിയാല്‍ വില്ലേജ് തല സംരംഭകന് (വി.എല്‍.ഇ.) 200 രൂപയാണ് സമ്മാനം. ഒരു ജില്ല മുഴുവന്‍ കറന്‍സിരഹിതമാക്കാന്‍ സഹായിച്ചാല്‍ വി.എല്‍.ഇ. സൊസൈറ്റികള്‍ക്ക് ഒരുലക്ഷം രൂപമുതല്‍ അഞ്ചുലക്ഷം രൂപവരെ പാരിതോഷികവും കേന്ദ്രം പ്രഖ്യാപിച്ചു. രാജ്യത്തെ അതിവേഗം കേറന്‍സിരഹിതമാക്കുകയാണ് പദ്ധതിയുടെ ലക്ഷ്യം.
ആദ്യഘട്ടത്തില്‍, രാജ്യത്തെ ഒരുകോടി ജനങ്ങളെയും 25 ലക്ഷം ചെറുകിട കച്ചവടക്കാരെയും ഓണ്‍ലൈന്‍ ഇടപാടിന് പ്രാപ്തരാക്കും. പൊതുസേവനകേന്ദ്രങ്ങളുടെ ഉടമകളായ വില്ലേജ്തല സംരംഭകര്‍ കേരളത്തിലടക്കം രാജ്യമൊട്ടാകെ പരിശീലനം തുടങ്ങിയിട്ടുണ്ട്. വ്യാപാരിസംഘടനകള്‍, റെസിഡന്റ്‌സ് അസോസിയേഷനുകള്‍, സ്വയംസഹായസംഘങ്ങള്‍ എന്നിവയുടെ സഹകരണത്തോടെയാണ് പരിശീലനം.
സ്മാര്‍ട്ട് ഫോണ്‍, സൈ്വപ്പിങ് യന്ത്രങ്ങള്‍ എന്നിവ ഉപയോഗിച്ചുള്ള ഇടപാടുകള്‍ക്കാണ് പ്രാധാന്യം. വിവിധതരം ഇ-വാലറ്റുകളുടെ ഉപയോഗവും പഠിപ്പിക്കണം. ആധാര്‍ അധിഷ്ഠിതമായ പണമിടപാട് രീതികളും സിലബസിലുണ്ട്. കേരളത്തിലെ 14 ജില്ലകളിലും ഇതിനായി വി.എല്‍.ഇ. സൊസൈറ്റികളുണ്ട്. കൂടാതെ, രണ്ടായിരത്തിലധികം വി.എല്‍.ഇ. സംരംഭകരും. അക്കൗണ്ടില്ലാത്തയാള്‍ക്ക് ബാങ്ക് അക്കൗണ്ട് എടുത്തുനല്‍കിയാല്‍ ആളൊന്നിന് 10 രൂപ ലഭിക്കും. പത്ത് ചെറുകിട കച്ചവടക്കാരെ ഇപേമെന്റ് സംവിധാനം പഠിപ്പിച്ചാല്‍ 100 രൂപയും കൈത്തൊഴിലുകാര്‍, ഉത്പന്നങ്ങള്‍ കൊണ്ടുനടന്ന് വില്‍ക്കുന്നവര്‍ എന്നിവരെ പഠിപ്പിച്ചാല്‍ 10 പേര്‍ക്ക് 100 രൂപയും ലഭിക്കും.
സാധാരണക്കാരെ ഓണ്‍ലൈന്‍ ഇടപാട് പഠിപ്പിക്കാനുള്ള കേന്ദ്രപദ്ധതിക്ക് മികച്ച പ്രതികരണം. രാജ്യത്തെ 2,20,264 പേര്‍ പുതുതായി ഇ പേമെന്റ് സംവിധാനം ഉപയോഗിച്ചുതുടങ്ങി. ഓണ്‍ലൈന്‍ ഇടപാട് പഠിക്കാന്‍ 2,41,982 പേരും 10,000 ചെറുകിടവ്യാപാരികളും രജിസ്റ്റര്‍ ചെയ്തു.
Discussion about this post