അടൂര്‍:എം.എല്‍.എയ്‌ക്കെതിരെ ജാതീയമായി അധിക്ഷേപകരമായ പരാമര്‍ശം നടത്തിയ സി.പി.ഐ. ജില്ലാ നേതാവിനെതിരെ പാര്‍ട്ടി അന്വേഷണം ആരംഭിച്ചു. അടൂര്‍ എം.എല്‍.എ ചിറ്റയം ഗോപകുമാറിനെയാണ് ജാതീയമായി അധിക്ഷേപിച്ചത്. ഒരു സ്വകാര്യ ഫോണ്‍ സംഭാഷണത്തിലാണ് സി.പി.ഐ. ജില്ലാ അസിസ്റ്റന്റ് സെക്രട്ടറി മനോജ് ചരളേല്‍ ചിറ്റയം ഗോപകുമാറിനെതിരെ മോശമായ ജാതീയ അധിക്ഷേപം ഉന്നയിച്ചെന്നാണ് ആക്ഷേപം. രണ്ടു ദിവസമായി നവമാധ്യമങ്ങളിലെല്ലാം ഈ സംഭാഷണം വ്യാപകമായി പ്രചരിക്കുകയാണ്.
കമ്മ്യൂണിസ്റ്റ് നേതാക്കന്മാരുടെ മനസ്സില്‍ ഇപ്പോഴും സ്വകാര്യമായി ഫ്യൂഡല്‍ ജന്മി മനോഭാവം നില്‍ക്കുന്നതിന്റെ തെളിവാണിത്. പാര്‍ട്ടി നേതാവിനെതിരെ ശക്തമായ നടപടി ആവശ്യപ്പെട്ട് സി.പി.ഐ.യുടെ ഒരു വിഭാഗം നേതാക്കന്മാരും നിലപാട് സ്വീകരിച്ചിട്ടുണ്ട്. ചിറ്റയം ഗോപകുമാര്‍ ഇക്കാര്യത്തില്‍ പാര്‍ട്ടിക്ക് പരാതി നല്കിയിട്ടില്ലെങ്കിലും നവമാധ്യമങ്ങളിലും പൊതുസമൂഹത്തിലും വലിയ വിമര്‍ശനമായതോടെയാണ് പാര്‍ട്ടി നടപടികളിലേക്ക് നീങ്ങിയത്.
ബുധനാഴ്ച പത്തനംതിട്ടയില്‍ ചേര്‍ന്ന ജില്ലാ എക്‌സിക്യൂട്ടീവ് കമ്മിറ്റി വിഷയം ചര്‍ച്ച ചെയ്തു. ആരോപണവിധേയനായ നേതാവ് യോഗത്തില്‍ പങ്കെടുത്തുമില്ല. 48 മണിക്കൂറിനുള്ളില്‍ വിശദീകരണം എഴുതി നല്‍കാന്‍ നേതാവിനോട് യോഗം ആവശ്യപ്പെട്ടിട്ടുണ്ട്. 18ന് നടക്കുന്ന ജില്ലാ എക്‌സിക്യൂട്ടീവും ജില്ലാ കൗണ്‍സിലും വിഷയത്തില്‍ അന്തിമമായ തീരുമാനമെടുക്കുമെന്ന് ജില്ലാ സെക്രട്ടറി എ.പി.ജയന്‍ പറഞ്ഞു.
Discussion about this post