ബ്രസീലില് 62 പേരുടെ മരണത്തിനു കാരണമായ വിമാനാപകടത്തിന്റെ ദൃശ്യങ്ങള് വ്യാപകമായി ഇന്റര്നെറ്റില് പ്രചരിക്കുകയാണ്. വിമാനം താഴേക്ക് പതിക്കുന്ന ദൃശ്യങ്ങള് വളരെ ഭീതിജനകമാണ്. ഇപ്പോള് പുറത്തുവരുന്ന റിപ്പോര്ട്ടുകള് പ്രകാരം വിമാനം അപകട്തില് പെട്ടതിന് പിന്നില് ‘ഡെത്ത് സ്പൈറല്’ എന്ന പ്രതിഭാസമാണെന്നാണ് സൂചന. ആകാശത്തു നിന്നും യാത്രാവിമാനം വട്ടം ചുറ്റി താഴേക്കു വീഴുന്നതിന്റെ ദൃശ്യങ്ങള് ഓണ്ലൈനില് വ്യാപകമായി പ്രചരിക്കുന്നുണ്ട്. ബ്രസീലിലെ വിന്യെദോ നഗരത്തില് ജനവാസമേഖലയിലാണ് വിമാനം പതിച്ചത്.
ബ്രസീലിലെ കസ്കവെലില് നിന്നു സാവോപോളോയിലേക്കു പോയ യാത്രാവിമാനമാണ് താഴേക്കു പതിച്ചത്. വിമാനത്തിന്റെ ഒരു ചിറകിലെ എന്ജിന് പ്രവര്ത്തനരഹിതമാവുകയും മറ്റേ ചിറകിലെ എന്ജിന് പ്രവര്ത്തിക്കുകയും ചെയ്യുമ്പോഴാണ് സാധാരണയായി ‘ഡെത്ത് സ്പൈറല്’ എന്ന മരണച്ചുഴി സംഭവിക്കാറ്. ഇതിലേക്ക് നയിക്കുന്നത് പ്രധാനമായും സാങ്കേതിക പിഴവ്, വളരെ വലിയ തോതിലുള്ള എയര് ടര്ബുലന്സ്, പൈലറ്റിന്റെ പിഴവ് അല്ലെങ്കില് ചിറകില് പക്ഷിയോ മറ്റോ ഇടിക്കുന്നത് തുടങ്ങിയ കാരണങ്ങളാണ്.
മുമ്പ് യുഎസ് എയര്വേസിന്റെ ഫ്ളൈറ്റ് 1549നും ഇതേ അനുഭവം നേരിട്ടിരുന്നു. വിമാനം ഹഡ്സണ് നദിയില് ഇറക്കേണ്ടി വന്ന സംഭവവും ഇത്തരത്തിലുള്ളതായിരുന്നു. അന്നു വിമാനത്താവളത്തില് നിന്നും പറന്നുയര്ന്ന് 700 അടിയിലെത്തിയപ്പോള് പക്ഷി ഇടിച്ചതായിരുന്നു അപകടകാരണം. പക്ഷി ഇടിച്ചു വിമാനത്തിന്റെ എന്ജിന് പ്രവര്ത്തനരഹിതമാവുകയായിരുന്നു.
ബ്രസീലില് എടിആര്-72 വിമാനം 17,000 അടി മുകളില് പറക്കുമ്പോഴാണ് അപകടത്തില്പെട്ടത്. അതിനാല് തന്നെ പക്ഷി ഇടിച്ച് അപകടം സംഭവിക്കാനുള്ള സാധ്യതയില്ല വലിയ തോതിലുള്ള എയര് ടര്ബുലന്സില് പെടുകയോ പൈലറ്റിന് പിഴവു സംഭവിക്കുകയോ ചെയ്തതാവാം അപകടകാരണമെന്ന സൂചനയാണ് ഇതില് നിന്നും ലഭിക്കുന്നത്.
14 വര്ഷം പഴക്കുമുണ്ടായിരുന്ന എടിആറാണ് അപകടത്തില് പെട്ടത്, പ്രാറ്റ് ആന്ഡ് വിറ്റ്നി കാനഡയുടെ പിഡബ്ല്യു 127 എഫ് എന്ജിനായിരുന്നു വിമാനത്തില് ഉപയോഗിച്ചിരുന്നത്. അപകടം സംഭവിച്ചപ്പോള് വിമാനം 17000 അടി ഉയരത്തില് 556 കിലോമീറ്റര് വേഗത്തിലായിരുന്നു സഞ്ചരിച്ചുകൊണ്ടിരുന്നത്.
Discussion about this post