ലക്നൗ: പ്രധാനമന്ത്രി നരേന്ദ്രമോദിയുടെ പിതാവിന്റെ പേര് ഗൗതം അദാനിയുടെ പേരുമായി ചേർത്ത് വെച്ച് അദ്ദേഹത്തെ അവഹേളിച്ച കോൺഗ്രസ് വക്താവ് പവൻ ഖേരയ്ക്കെതിരെ കേസ് രജിസ്റ്റർ ചെയ്ത് യുപി പോലീസ്. ബിജെപി എംഎൽസി മുകേഷ് ശർമ്മ നൽകിയ പരാതിയിലാണ് ഹസ്രത് ഗഞ്ച് പോലീസ് എഫ്ഐആർ രജിസ്റ്റർ ചെയ്തത്. നരേന്ദ്ര ഗൗതം ദാസ് മോദി എന്നായിരുന്നു പവൻ ഖേര പ്രധാനമന്ത്രിയെ പരിഹസിച്ച് വിളിച്ചത്.
വാർത്താസമ്മേളനത്തിൽ സംസാരിക്കുന്നതിനിടെ ആയിരുന്നു പവൻ ഖേരയുടെ വാക്കുകൾ. പ്രധാനമന്ത്രിയുടെ പേര് നരേന്ദ്ര ദാമോദർ ദാസ് മോദി എന്നാണോ ഗൗതം ദാസ് ആണോ ?. പേര് ദാമോദർ ദാസ് എന്നാണെങ്കിലും അദ്ദേഹത്തിന്റെ പ്രവൃത്തി ഗൗതം ദാസിന് സമാനമാണെന്നും പവൻ ഖേര പറഞ്ഞിരുന്നു.
അദാനി ഹിൻഡൻബെർഗ് വിഷയം പരാമർശിക്കവേ ആയിരുന്നു പ്രധാനമന്ത്രിയെ കോൺഗ്രസ് നേതാവ് അവഹേളിച്ചത്. അടൽ ബിഹാരി വാജ്പേയിക്ക് സംയുക്ത പാർലമെന്ററി കമ്മിറ്റി രൂപീകരിക്കാമെങ്കിൽ നരേന്ദ്ര ഗൗതം ദാസ് മോദിക്ക് എന്താണ് കുഴപ്പം എന്നായിരുന്നു പവൻ ഖേരയുടെ പരാമർശം. മാദ്ധ്യമപ്രവർത്തകർ ഇക്കാര്യം ചൂണ്ടിക്കാട്ടിയപ്പോൾ അദ്ദേഹം പരിഹസിച്ച് ചിരിക്കുകയും ചെയ്തിരുന്നു.
പ്രധാനമന്ത്രിയെ പവൻ ഖേര മനപ്പൂർവ്വം അവഹേളിക്കുകയായിരുന്നുവെന്നും ജനങ്ങൾക്ക് അതിൽ അമർഷമുണ്ടെന്നും ബിജെപി നേതാക്കൾ ചൂണ്ടിക്കാട്ടി. ഹസ്രത് ഗഞ്ച് പോലീസ് സ്റ്റേഷനിലാണ് പരാതി നൽകിയത്.
Discussion about this post