അതിരപ്പിളളി; അതിരപ്പിള്ളി പഞ്ചായത്തിലെ മുക്കുംപുഴ ആദിവാസി കോളനിയിലെ യാത്രാ ദുരിതത്തിന് പരിഹാരമൊരുക്കി നടനും മുൻ എംപിയുമായ സുരേഷ് ഗോപി. ഊരിൽ നേരിട്ടെത്തി ഊരു മൂപ്പൻ രാമചന്ദ്രന് ഫൈബർ ബോട്ടും, എയർ ജാക്കറ്റുകളും അദ്ദേഹം കൈമാറി. ഇപ്പോഴും തന്നെ സ്‌നേഹിക്കുന്ന സിനിമാ പ്രേമികൾ ഉളളതുകൊണ്ടാണ് അല്ലെങ്കിൽ, തന്നെ ദ്രോഹിക്കുന്നവർക്കെതിരെ അവരുടെ ശക്തി കൂടി വരുന്നതുകൊണ്ടാണ് ഇത് ചെയ്യാൻ കഴിയുന്നതെന്ന് ചടങ്ങിൽ സുരേഷ് ഗോപി പറഞ്ഞു.
എത്ര ഒച്ചപ്പാട് എടുത്താലും ഇത്തരം കാര്യങ്ങൾ ചെയ്തുകൊണ്ടേ ഇരിക്കുമെന്നും അദ്ദേഹം കൂട്ടിച്ചേർത്തു. നാല് പ്രദേശവും വെള്ളത്താൽ ചുറ്റപ്പെട്ട ദ്വീപു പോലെയുള്ള പൊരിങ്ങൽ കൂത്ത് ഡാമിന്റെ പരിധിയിലാണ് ഈ പ്രദേശം. അസുഖവും മറ്റും വന്നാൽ തുരുത്തിൽ നിന്ന് ആശുപത്രിയിൽ പോകുവാൻ പോലും ഇവർ ബുദ്ധിമുട്ടിയിരുന്നു. ഇവരെ കരക്കെത്തിക്കുവാൻ മതിയായ യാത്രാസൗകര്യമില്ലാത്തത് ആയിരുന്നു കാരണം. ഈ ദുരിതത്തിനാണ് ഇതോടെ പരിഹാരമായത്. ഗർഭിണികളെ ആശുപത്രിയിലെത്തിക്കുന്നതിനിപ്പുറം പ്രസവിക്കുന്നതും കുട്ടി മരിക്കുന്നതുമൊക്കെ ഇവിടെ പതിവ് സംഭവങ്ങളായിരുന്നു. ഇത് ശ്രദ്ധയിൽപെട്ടതോടെയാണ് സുരേഷ് ഗോപി നേരിട്ട് സഹായവുമായി എത്തിയത്.
അതിരപ്പിള്ളി പഞ്ചായത്തിലെ വിവിധ ഊരുകളിൽ സ്ട്രെക്ച്ചർ മോഡൽ മഞ്ചൽ നൽകുവാൻ വെറ്റിലപ്പാറയിലെത്തിയപ്പോൾ ബിജെപി പഞ്ചായത്തംഗം സനീഷ ഷെമിയോട് ആരോഗ്യ പ്രവർത്തകർ മുക്കുംപുഴ കോളനിയിലെ സ്ത്രീകൾ അടക്കമുള്ളവരുടെ യാത്ര ദുരിതത്തെക്കുറിച്ച് വിശദീകരിച്ചിരുന്നു. തുടർന്നാണ് എട്ട് ദിവസത്തിനുള്ളിൽ മകളുടെ പേരിലുള്ള ചാരിറ്റബിൾ ട്രസ്റ്റിന്റെ നേതൃത്വത്തിൽ പരിസ്ഥിതിക്ക് അനുയോജ്യമായ രീതിയിലുള്ള ഫൈബർ ബോട്ട് സമ്മാനിക്കുവാൻ സുരേഷ്‌ഗോപി അവസരമൊരുക്കിയത്.
സുരേഷ് ഗോപിയോടൊപ്പം നടൻ ടിനി ടോം, സിനിമ സംവിധായകൻ മാർത്താണ്ഡൻ,
നിർമ്മാതാവ് സന്തോഷ് പവിത്രം, ഫൈബർ ബോട്ട് നിർമ്മിച്ച നിഷിജിത്ത് കെ ജോൺ തുടങ്ങിയവരും ഉണ്ടായിരുന്നു. സിനിമാ മേഖലയിൽ പത്ത് ലക്ഷത്തിലധികം രൂപ വരുമാനമുള്ള അഭിനേതാക്കൾ പതിനായിരം രൂപ പ്രതിമാസം ആദിവാസി ക്ഷേമത്തിനായി നേരിട്ട് എത്തിക്കാൻ സാധിച്ചാൽ അതിലും വലിയൊരു പുണ്യമില്ലെന്നും എല്ലാവരും മനസ് വെച്ചാൽ ഈ മേഖലയിൽ വലിയൊരു മാറ്റത്തിന് തുടക്കം കുറിക്കാമെന്നും സുരേഷ് ഗോപി അഭിപ്രായപ്പെട്ടു.
ബിജെപി ജില്ലാ പ്രസിഡന്റ് അഡ്വ.കെ.കെ.അനീഷ് കുമാർ, കൊരട്ടി മണ്ഡലം പ്രസിഡന്റ് സജീവ് പള്ളത്ത്, ജില്ലാ ജനറൽ സെക്രട്ടറി ജസ്റ്റിൻ ജേക്കബ്ബ്, പട്ടികജാതി മോർച്ച സംസ്ഥാന ജനറൽ സെക്രട്ടറി പി.കെ.ബാബു, ജില്ലാ സെക്രട്ടറി എൻ.ആർ.റോഷൻ പഞ്ചായത്തംഗങ്ങളായ സനീഷ ഷെമി, ആശ രാകേഷ്, അംബിക ബാബു, സൗമ്യ മോഹൻദാസ് തുടങ്ങിയവരും ചടങ്ങിൽ പങ്കെടുത്തു.
Discussion about this post