ഏഥൻസ്: ഗ്രീസിൽ തീവണ്ടി ദുരന്തം. ചരക്ക് തീവണ്ടിയുമായി പാസഞ്ചർ തീവണ്ടി കൂട്ടിയിടിച്ച് 16 പേർ കൊല്ലപ്പെട്ടു. 85 പേർക്ക് പരിക്കേറ്റു. അർദ്ധരാത്രി ടെപിൽവച്ചായിരുന്നു സംഭവം.
350 ഓളം പേരായിരുന്നു അപകട സമയം തീവണ്ടിയിൽ ഉണ്ടായിരുന്നത്. ഇതിൽ 250 ഓളം പേർ സുരക്ഷിതരാണെന്ന് അധികൃതർ അറിയിച്ചു. ഇടിയുടെ ആഘാതത്തിൽ പാസഞ്ചർ തീവണ്ടി പൂർണമായും തകർന്നു. ആദ്യ മൂന്ന് കോച്ചുകളിൽ തീപിടുത്തം ഉണ്ടായി. ഏറെ നേരത്തെ പരിശ്രമത്തിന് ശേഷമാണ് തീ അണയ്ക്കാൻ കഴിഞ്ഞത്. സ്ഥലത്ത് ഇപ്പോഴും രക്ഷാ പ്രവർത്തനങ്ങൾ പുരോഗമിക്കുകയാണ്.
പരിക്കേറ്റവർ അടുത്തുള്ള ആശുപത്രികളിൽ ചികിത്സയിലാണ്. ഇവരിൽ പലരുടെയും നില ഗുരുതരമാണെന്നാണ് വിവരം. അതിനാൽ മരണ സംഖ്യ വീണ്ടും ഉയരാനാണ് സാദ്ധ്യത. അപകടത്തിന്റെ കാരണം എന്തെന്ന് ഇതുവരെ വ്യക്തമല്ല.
തീവണ്ടികൾ തമ്മിൽ ശക്തമായ കൂട്ടിയിടിയായിരുന്നു ഉണ്ടായതെന്ന് തെസ്സാലി മേഖല ഗവർണർ കോൺസ്റ്റാന്റിനസ് അഗ്രാസ്റ്റോസ് പറഞ്ഞു. പാസഞ്ചർ തീവണ്ടിയുടെ ആദ്യ നാല് കോച്ചുകൾ പാളം തെറ്റി. മൂന്ന് കോച്ചുകൾ പൂർണമായി തകർന്നു. പ്രദേശത്ത് രക്ഷാ പ്രവർത്തനങ്ങൾ പുരോഗമിക്കുകയാണ്. രാത്രിയായതിനാൽ രക്ഷാ പ്രവർത്തനങ്ങൾക്ക് തടസ്സമുണ്ടായെന്നും അദ്ദേഹം വ്യക്തമാക്കി.
Discussion about this post