തൃശ്ശൂര്: ആനകളുടെ പാപ്പാന്മാര് കോവിഡ് പരിശോധനയ്ക്ക് വിധേയരാകുകയും രോഗബാധ ഇല്ലെന്ന സര്ട്ടിഫിക്കറ്റ് ഹാജരാക്കുകയും വേണം. കോവിഡ് നെഗറ്റീവ് സര്ട്ടിഫിക്കറ്റ് ഉള്ള പാപ്പാന്മാരുടെ ആനകളെ മാത്രമേ പൂരത്തില് പങ്കെടുക്കാന് അനുവദിക്കൂ എന്ന് വനംവകുപ്പ് വ്യക്തമാക്കി. അതുപോലെ തന്നെ, പൂരത്തില് പങ്കെടുക്കുന്ന ആനകളുടെ ആരോഗ്യനില പരിശോധിക്കുന്നതിന് നാല്പത് അംഗ സംഘത്തെയും നിയോഗിച്ചിട്ടുണ്ട്.
ഒരു ആനയ്ക്ക് ചുരുങ്ങിയത് മൂന്ന് പാപ്പാന്മാരെങ്കിലും ഉണ്ടാകണം, മൂന്ന് പാപ്പാന്മാരും കോവിഡ് നെഗറ്റീവ് ആയിരിക്കണം, ആരെങ്കിലും ഒരാള് പോസിറ്റീവ് ആയാല് ആനയെ പൂരത്തില് പങ്കെടുപ്പിക്കാന് കഴിയില്ല, മാത്രമല്ല, ഒരാള് പോസിറ്റീവ് ആയാല് മറ്റു പാപ്പാന്മാര് ക്വാറന്റീനില് പോകുകയും വേണം തുടങ്ങിയ നിർദ്ദേശങ്ങളാണ് വനംവകുപ്പ് മുന്നോട്ട് വച്ചിരിക്കുന്നത്.
തൊണ്ണൂറോളം ആനകളാണ് പൂരത്തില് പങ്കെടുക്കുന്നത്. ഈ ആനകള്ക്കെല്ലാം കൂടി മുന്നൂറിന് അടുത്ത് പാപ്പാന്മാരുണ്ടാകും. വനംവകുപ്പിന്റെ നിബന്ധനയനുസരിച്ച് ഇവരെല്ലാം കോവിഡ് നെഗറ്റീവ് സര്ട്ടിഫിക്കറ്റ് ഹാജരാക്കേണ്ടിവരും. പൂരത്തിന്റെ തലേന്ന് ആയിരിക്കും ഇക്കാര്യത്തില് പരിശോധന നടത്തുക.
Discussion about this post