ഹൈദരാബാദ്: ഒന്പതാംക്ലാസുകാരന് ഓടിച്ച കാര് റോഡരികിലെ കുടിലിലേക്ക് പാഞ്ഞുകയറി നാല് സ്ത്രീകള്ക്ക് ദാരുണാന്ത്യം. തെലങ്കാനയിലെ കരിംനഗറില് ഇക്കഴിഞ്ഞ ഞായറാഴ്ച്ചയാണ് നടുക്കുന്ന അപകടം. സംഭവത്തില് കാറോടിച്ച വിദ്യാര്ത്ഥിയുടെ പിതാവിനെ അറസ്റ്റുചെയ്തു. പൊലീസ് പിതാവിനെതിരെ നരഹത്യയ്ക്ക് കേസെടുക്കുമെന്ന് വ്യക്തമാക്കിയിട്ടുണ്ട്.
കുടിലുകള് ഇടിച്ച് തെറിപ്പിച്ച ശേഷം കാര് ഡ്രൈനേജ് കനാലിലേക്ക് വീണു. മൂന്ന് സ്ത്രീകള് സംഭവസ്ഥലത്ത് വെച്ചും ഒരാള് ആശുപത്രിയില് വെച്ചും ആണ് മരണപ്പെട്ടത്. മൂന്ന് പേര്ക്ക് പരിക്കേല്ക്കുകയും ചെയ്തു. ഫരിയാദ്, സുനിത, ലളിത, ജ്യോതി എന്നിവരാണ് മരിച്ചതെന്ന് പൊലീസ് അറിയിച്ചു. വാഹനം ഓടിച്ചയാള് അപകടം നടന്ന ഉടന് സംഭവ സ്ഥലത്ത് നിന്ന് ഓടി രക്ഷപ്പെട്ടിരുന്നു.
തുടര്ന്ന് പൊലീസ് നടത്തിയ അന്വേഷണത്തില് ഒന്പതാം ക്ലാസ് വിദ്യാര്ത്ഥിയാണ് വാഹനം ഓടിച്ചതെന്ന് കണ്ടെത്തുകയായിരുന്നു. ഇയാളുടെ പിതാവിനെയും കാറിലുണ്ടായിരുന്ന സുഹൃത്തുക്കളെയും പൊലീസ് അറസ്റ്റു ചെയ്തു. പ്രായപൂര്ത്തിയാവാത്ത വിദ്യാര്ത്ഥി കാറ് ഓടിക്കുന്ന വിവരം ബിസിനസുകാരനായ പിതാവിന് അറിവുണ്ടായിരുന്നെന്നും അന്വേഷണത്തില് വ്യക്തമായി. ഇയാള്ക്കെതിരെ നരഹത്യ കുറ്റം ചുമത്തുമെന്നും പൊലീസ് പറഞ്ഞു.
Discussion about this post