ഇന്ത്യയുടെ മുന് ക്രിക്കറ്റ് താരം മഹേന്ദ്രസിംഗ് സിംഗ് ധോനിയുടെ മകളുടെ ഒരു ചിത്രം സാമൂഹ്യ മാധ്യമങ്ങളില് വൈറലായിരിക്കുകയാണ്. ക്യാപ്റ്റന് കൂളിന്റെ മകള് സിവ അര്ജന്റീനയുടെ ജഴ്സി അണിഞ്ഞാണ് ചിത്രത്തില്, അത് സമ്മാനിച്ചതോ സാക്ഷാല് മിശിഹ ! മെസിയുടെ കൈയൊപ്പും ജഴ്സിയില് വ്യക്തമായി കാണാം.
ജഴ്സിയില് സ്പാനിഷ് ഭാഷയില് ‘സിവയ്ക്കായി’ എന്നെഴുതിയാണ് അര്ജന്റീനയുടെ സൂപ്പര്താരം ലയണല് മെസി ധോനിയുടെ മകള്ക്ക് സമ്മാനിച്ചിരിക്കുന്നത്. പത്താം നമ്പര് ജഴ്സിയിട്ട് വളരെ സന്തോഷവതിയാണ് സിവ ചിത്രങ്ങളിലെല്ലാം. സിവ സിംഗ് ധോനി എന്ന പേരിലുള്ള സിവയുടെ ഔദ്യോഗിക ഇന്സ്റ്റഗ്രാം അക്കൗണ്ടില് പോസ്റ്റ് ചെയ്തിരിക്കുന്ന ചിത്രങ്ങള് ഇതിനോടകം തന്നെ സാമൂഹ്യ മാധ്യമങ്ങളില് വൈറലായി.
സിവയുടെ മാതാപിതാക്കളായ എംഎസ് ധോനിയും സാക്ഷി ധോനിയുമാണ് ഏഴു വയസുകാരിയായ മകളുടെ അക്കൗണ്ട് കൈകാര്യം ചെയ്യുന്നത്. അച്ഛനെപ്പോല തന്നെ മകളും എന്ന തലക്കെട്ടില് പോസ്റ്റ് ചെയ്ത ചിത്രങ്ങള് ഏതാനും മണിക്കൂറുകള്ക്കകം നെറ്റിസണ്സ് തരംഗമാക്കി.
ധോനിയുടെ ഫുട്ബോള് പ്രേമം ആരാധകര്ക്ക് അറിവുള്ളതാണ്. ഇന്ത്യന് സൂപ്പര് ലീഗിലെ ഫുട്ബോള് ക്ലബ്ബായ ചെന്നെയിന് എഫ്സിയുടെ സഹഉടമയാണിപ്പോള് ധോനി. താരം ഫുട്ബോള് കളിക്കുന്ന നിരവധി ചിത്രങ്ങളും സാമൂഹ്യ മാധ്യമങ്ങളില് ശ്രദ്ധ നേടിയിട്ടുണ്ട്.
Discussion about this post