മലപ്പുറം : ഹെൽമെറ്റില്ലാതെ വാഹനം ഓടിച്ചെന്ന് കാണിച്ച് കാർ യാത്രികന് പിഴ ചുമത്തി എംവിഡി. മലപ്പുറം സ്വദേശി മുഹമ്മദ് സാലിക്കാണ് 500 രൂപ പിഴയടക്കാൻ നോട്ടീസ് അയച്ചത്. തെറ്റ് തിരിച്ചറിഞ്ഞതോടെ ഉദ്യോഗസ്ഥർ തന്നെ സംഭവം ഒത്തുതീർപ്പാക്കി.
KL 55 V 1610 എന്ന വാഹനത്തിൽ ഹെൽമെറ്റില്ലാതെ യാത്ര ചെയ്തതിന് 500 രൂപ പിഴയടയ്ക്കണമെന്ന് ആവശ്യപ്പെട്ടാണ് സാലിയുടെ ഫോണിലേക്ക് സന്ദേശം എത്തിയത്. രണ്ട് യുവാക്കൾ ബൈക്കിൽ ഹെൽമെറ്റ് ധരിക്കാതെ യാത്രചെയ്യുന്ന ചിത്രമാണ് നോട്ടീസിലുള്ളത്. എന്നാൽ സാലിക്ക് ഈ നമ്പറിലുള്ളത് ആൾട്ടോ കാറാണ്. അത് മാത്രമല്ല നിയമലംഘനം നടന്നെന്ന് നോട്ടീസിൽ പറയുന്ന ബാവപ്പടി എന്ന സ്ഥലത്തിലൂടെ സാലി അന്നേദിവസം യാത്ര ചെയ്തിട്ടുമില്ല.
ഇതോടെ മോട്ടോർവാഹന വകുപ്പ് ഉദ്യോഗസ്ഥർ സ്ഥലത്തെത്തി കാര്യങ്ങൾ പറഞ്ഞ് ഒത്തുതീർപ്പാക്കി. ദൃശ്യം റോഡിലെ ക്യാമറയിൽ പതിഞ്ഞപ്പോൾ വാഹന നമ്പർ തെറ്റിയതാകാം പിഴവിന് കാരണമെന്നാണ് നിഗമനം.
Discussion about this post