ലക്നൗ; ഉത്തർപ്രദേശിലെ ലെജിസ്ലേറ്റീവ് കൗൺസിലിലേക്ക് ഒഴിവ് വന്ന രണ്ട് സീറ്റുകളിലേക്ക് നടന്ന ഉപതിരഞ്ഞെടുപ്പിൽ ബിജെപിക്ക് വിജയം. ബിജെപിയുടെ പദംസെൻ ചൗധരി, മാനവേന്ദ്ര സിങ് എന്നിവർ വിജയിച്ചു.ബിജെപിയുടെ പദംസെൻ ചൗധരിക്ക് 279 വോട്ടും എസ്പിയുടെ രാംകരന് 116 വോട്ടും ലഭിച്ചു. ഒരു വോട്ട് അസാധുവായി.ബിജെപിയുടെ മാനവേന്ദ്ര സിങ്ങിന് 280 വോട്ടും എസ്പിയുടെ രാംജതന് 116 വോട്ടും രണ്ടാം സീറ്റിൽ ലഭിച്ചു.
സംസ്ഥാന നിയമസഭയിലെ ആകെയുള്ള 403 എംഎൽഎമാരിൽ 396 പേരും വോട്ട് രേഖപ്പെടുത്തി. സമാജ്വാദി പാർട്ടിയുടെ രണ്ട് എംഎൽഎമാർക്കും
സുഭാഷ്പയുടെ ഒരാൾക്കും ജയിലിലായതിനാൽ വോട്ട് ചെയ്യാൻ കഴിഞ്ഞില്ല. അതേസമയം, അനാരോഗ്യം കാരണം എസ്പി എംഎൽഎ മനോജ് പരാസിനും വോട്ട് ചെയ്യാൻ കഴിഞ്ഞില്ല. രണ്ട് കോൺഗ്രസ് എംഎൽഎമാരും ബിഎസ്പിയുടെ ഒരു എംഎൽഎയും വോട്ടെടുപ്പിൽ നിന്ന് വിട്ടുനിന്നു.
എന്താണ് ലെജിസ്ലേറ്റീവ് കൗൺസിൽ
ഭരണഘടനയുടെ ആർട്ടിക്കിൾ 169 അനുസരിച്ച്, ഒരു സംസ്ഥാനത്ത് ലെജിസ്ലേറ്റീവ് കൗൺസിൽ സൃഷ്ടിക്കുകയോ ഇല്ലാതാക്കുകയോ ചെയ്യാം. അതിനുള്ള നടപടിക്രമങ്ങൾ ഇവയാണ്: ലെജിസ്ലേറ്റീവ് കൗൺസിൽ സ്ഥാപിക്കുന്നതിനോ ഇല്ലാതാക്കുന്നതിനോ, കുറഞ്ഞത് മൂന്നിൽ രണ്ട് ഭൂരിപക്ഷത്തിൽ അതാത് സംസ്ഥാന നിയമസഭകൾ പ്രമേയം പാസാക്കുകയും, പാർലമെന്റിൽ ഈ ബിൽ പാസാകുകയും വേണം.
നിലവിൽ ആറ് സംസ്ഥാനങ്ങൾക്ക് നിയമനിർമാണ സമിതിയുണ്ട്. ഉത്തർപ്രദേശ്, ആന്ധ്രാപ്രദേശ്, ബിഹാർ, മഹാരാഷ്ട്ര, കർണാടക, തെലങ്കാന എന്നിവയാണ് ഈ സംസ്ഥാനങ്ങൾ. നേരത്തെ, അസം, മദ്ധ്യപ്രദേശ്, പഞ്ചാബ്, തമിഴ്നാട്, ജമ്മു-കാശ്മീർ എന്നീ സംസ്ഥാനങ്ങളിലും ഉപരിസഭകൾ ഉണ്ടായിരുന്നു.
30 വയസ് പൂർത്തിയായ, വോട്ടേഴ്സ് ലിസ്റ്റിൽ പേരുള്ള പൗരന്മാർക്കാണ് യോഗ്യത. എംപിയോ എംഎൽഎയോ ആയിരിക്കെ ലെജിസ്ലേറ്റീവ് കൗൺസിലിൽ അംഗമാകാനാകില്ല. ആറു വർഷമാണ് അംഗങ്ങളുടെ കാലാവധി. രാജ്യസഭയിലെന്നപോലെ, കൗൺസിലിലെ മൂന്നിലൊന്ന് അംഗങ്ങൾ രണ്ടു വർഷം കൂടുമ്പോൾ വിരമിക്കുന്നു.
കൗൺസിലിലെ മൂന്നിലൊന്ന് അംഗങ്ങളെ സംസ്ഥാന നിയമസഭ അസംബ്ലിയിലെ അംഗങ്ങളാണ് തിരഞ്ഞെടുക്കുന്നത്. മൂന്നിലൊന്ന് അംഗങ്ങളെ മുനിസിപ്പാലിറ്റികൾ, ഗ്രാമപഞ്ചായത്തുകൾ, പഞ്ചായത്ത് സമിതികൾ, ജില്ലാ കൗൺസിലുകൾ തുടങ്ങിയ തദ്ദേശ സ്വയംഭരണ സ്ഥാപനങ്ങളാണ് തിരഞ്ഞെടുക്കുന്നത്. ആറിലൊന്ന് അംഗങ്ങളെ തിരഞ്ഞെടുക്കുന്നത് ഗവർണറാണ്. കല, സാഹിത്യം, ശാസ്ത്രം, സഹകരണ പ്രസ്ഥാനം, സാമൂഹ്യസേവനം തുടങ്ങിയ മേഖകളിൽ പ്രാവീണ്യമുള്ളവരെയാണ് പരിഗണിക്കുക.
പന്ത്രണ്ടിലൊന്ന് അംഗങ്ങളെ സംസ്ഥാനത്തെ ബിരുദധാരികളാണ് തിരഞ്ഞെടുക്കുന്നത്. സംസ്ഥാനത്തെ കോളേജുകള്, സര്വകലാശാലകള് ഉള്പ്പെടെ സെക്കന്ഡറി സ്കൂളുകളില് താഴെയല്ലാത്ത, വിദ്യാഭ്യാസ സ്ഥാപനങ്ങളില് മൂന്ന് വര്ഷത്തില് കുറയാത്ത അധ്യാപന പരിചയമുള്ള അധ്യാപകരാണ് പന്ത്രണ്ടിലൊന്ന് അംഗങ്ങളെ തിരഞ്ഞെടുക്കുന്നത്.
Discussion about this post