തിരുവനന്തപുരം: സംസ്ഥാനത്ത് വീണ്ടും സർവ്വകാല റെക്കോർഡിൽ സ്വർണ വില. പവന് 51,000 കടന്നു. പവന് ഇന്ന് 600 രൂപ വർദ്ധിച്ചതോടെയാണ് റെക്കോർഡ് വീണ്ടും ഭേദിച്ചത്.
സ്വർണം പവന് 51,280 രൂപയാണ് വിപണി വില. ഗ്രാമിന് ഇന്ന് 75 രൂപ വർദ്ധിച്ചു. സ്വർണം ഗ്രാമിന് 6410 രൂപ എന്ന നിലയിലാണ് വ്യാപാരം പുരോഗമിക്കുന്നത്. തുടർച്ചയായ വർദ്ധനയ്ക്ക് പിന്നാലെ കഴിഞ്ഞ ദിവസം സ്വർണ വില അൽപ്പം താഴ്ന്നിരുന്നു. ഇതിന് പിന്നാലെയാണ് വീണ്ടും വില ഉയർന്നത്.
അന്താരാഷ്ട്ര വിപണിയിൽ സ്വർണ വില വർദ്ധിച്ചിട്ടുണ്ട്. ഇതാണ് കേരളത്തിലെ വിപണിയിലും പ്രതിഫലിച്ചത്. അന്താരാഷ്ട്ര സ്വർണ്ണവില 2285 ഡോളറും ഇന്ത്യൻ രൂപയുടെ വിനിമയ നിരക്ക് 83.38 ലും ആണ്. 24 കാരറ്റ് സ്വർണ്ണക്കട്ടിക്ക് ബാങ്ക് നിരക്ക് കിലോഗ്രാമിന് 72 ലക്ഷം രൂപയായിട്ടുണ്ട്.
സ്വർണത്തിന് സമാനമായി വെള്ളി വിലയിലും വർദ്ധനവ് ഉണ്ടായിട്ടുണ്ട്. ഒരു ഗ്രാം സാധാരണ വെള്ളിയ്ക്ക് 84 രൂപയാണ് വില.
ഹാൾമാർക്ക് വെള്ളിയുടെ വിലയിൽ മാറ്റമില്ല. വിപണി നിരക്ക് 103 രൂപയാണ്.
അതേസമയം വരും ദിവസങ്ങളിലും സ്വർണ വില ഉയർന്നേക്കാമെന്നാണ് സൂചന. അന്താരാഷ്ട്ര വിപണിയിൽ സ്വർണ വില ഇനിയും വർദ്ധിക്കുമെന്നാണ് സാമ്പത്തിക വിദഗ്ധർ അഭിപ്രായപ്പെടുന്നത്. ഇത് കേരളത്തിലെ സ്വർണവിലയെയും ബാധിയ്ക്കും.
Discussion about this post