വയനാട് : വയനാട്ടിലെ തലപ്പുഴയിൽ നിന്നും കുഴി ബോംബുകൾ കണ്ടെത്തി. ജലാറ്റിൻ സ്റ്റിക്ക് ഉൾപ്പെടെയുള്ള സ്ഫോടക വസ്തുക്കളും കണ്ടെത്തിയിട്ടുണ്ട്. തലപ്പുഴ മക്കിമല കൊടക്കുനിന്നും ആണ് കുഴി ബോംബുകളും സ്ഫോടക വസ്തുക്കളും കണ്ടെത്തിയത്. കുഴിച്ചിട്ട നിലയിലായിരുന്നു ഇവ കണ്ടെത്തിയത്.
ഫെൻസിങ് പരിശോധനയ്ക്ക് പോയിരുന്ന വനം വകുപ്പ് വാച്ചർമാരാണ് കുഴി ബോംബുകളും സ്ഫോടക വസ്തുക്കളും കണ്ടെത്തിയത്. തുടർന്ന് ഇവർ പോലീസിനെ വിവരമറിയിക്കുകയായിരുന്നു. പോലീസും ബോംബ് സ്ക്വാഡും സ്ഥലത്തെത്തി പരിശോധന നടത്തിയ ശേഷം സ്ഫോടക വസ്തുക്കൾ നിർവീര്യമാക്കി. സംഭവത്തെക്കുറിച്ച് വിശദമായ അന്വേഷണം നടത്തുമെന്ന് പോലീസ് അറിയിച്ചു.
കമ്മ്യൂണിസ്റ്റ് ഭീകരരുടെ സാന്നിധ്യം തിരിച്ചറിഞ്ഞിട്ടുള്ള മേഖലയിൽ നിന്നുമാണ് കുഴി ബോംബും സ്ഫോടക വസ്തുക്കളും കണ്ടെത്തിയിട്ടുള്ളത്. ഈ പ്രദേശത്ത് നേരത്തെ കമ്മ്യൂണിസ്റ്റ് ഭീകരരും തണ്ടർബോൾട്ട് സംഘവും തമ്മിൽ ഏറ്റുമുട്ടലുകൾ നടന്നിട്ടുണ്ട്. ഛത്തീസ്ഗഡിൽ കമ്മ്യൂണിസ്റ്റ് ഭീകരരുടെ കുഴിബോംബ് ആക്രമണത്തെ തുടർന്ന് മലയാളി സൈനികനായ വിഷ്ണു വീരമൃത്യു വരിച്ചതിന്റെ ഞെട്ടൽ മാറുന്നതിനു മുൻപേ ആണ് വയനാട്ടിൽ നിന്നും ഇത്തരത്തിൽ കുഴിബോംബ് കണ്ടെത്തിയിട്ടുള്ളത്.
Discussion about this post