തിരുവനന്തപുരം: നക്‌സലൈറ്റ് നേതാവായിരുന്ന വര്‍ഗീസിന്റെ വധവുമായി ബന്ധപ്പെട്ട് ആഭ്യന്തരവകുപ്പ് കോടതിയില്‍ നല്‍കിയ സത്യവാങ്മൂലത്തിനെതിരെ സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. വര്‍ഗീസ് വധത്തെ പറ്റിയുളള പാര്‍ട്ടി കാഴ്ചപ്പാട് ഇതല്ലെന്ന് കോടിയേരി സിപിഐഎം സംസ്ഥാന സമിതിയിലെ ചര്‍ച്ചയില്‍ വ്യക്തമാക്കി. പാര്‍ട്ടി നയത്തിന് നിരക്കുന്ന സത്യവാങ്മൂലമല്ല സര്‍ക്കാര്‍ സത്യവാങ്മൂലം നല്‍കിയത്. മുന്‍ സര്‍ക്കാര്‍ നിയോഗിച്ച അഭിഭാഷകനാണ് സത്യവാങ്മൂലം നല്‍കിയത്. ഈ അഭിഭാഷകനെ ഇടത് സര്‍ക്കാര്‍ മാറ്റിയിട്ടില്ലെന്നും കോടിയേരി സംസ്ഥാന സമിതിയില്‍ വിശദീകരിച്ചു.
സംസ്ഥാന ആഭ്യന്തര വകുപ്പ് 2016-ല്‍ ജൂണില്‍ ഹൈക്കോടതിയില്‍ സമര്‍പ്പിച്ച സത്യവാങ്മൂലത്തിലാണ് വര്‍ഗീസിനെ കൊള്ളക്കാരനും കൊലപാതകിയുമായി വിശേഷിപ്പിച്ചത്. വര്‍ഗീസിനെ വെടിവെച്ചു കൊന്നതല്ലെന്നും ഏറ്റുമുട്ടലില്‍ കൊല്ലപ്പെട്ടതാണെന്നും സത്യവാങ്മൂലത്തിലുണ്ട്. ഈ കേസില്‍ ഐജി ലക്ഷ്മണക്ക് ലഭിച്ച ജീവപര്യന്തം ശിക്ഷ അന്തിമമല്ലെന്നും റിപ്പോര്‍ട്ട് പറയുന്നു.
1970 ഫെബ്രുവരി 18നാണ് വയനാട്ടില്‍ നിന്ന് പിടികൂടിയ വര്‍ഗീസിനെ പൊലീസ് വെടിവെച്ചു കൊല്ലുന്നത്. മരിച്ച് 18 വര്‍ഷങ്ങള്‍ക്ക് ശേഷം വര്‍ഗീസിനെ കൊലപ്പെടുത്തിയ രാമചന്ദ്രന്‍ നായരുടെ വെളിപ്പെടുത്തലോടെയാണ് കുറ്റവാളികളായ പൊലീസുകാര്‍ക്കെതിരെ നിയമ നടപടി സ്വീകരിച്ചത്. എന്നാല്‍ അങ്ങനെയല്ല സംഭവിച്ചതെന്നും ഏറ്റുമുട്ടലില്‍ തന്നെയാണ് കൊല്ലപ്പെട്ടതെന്നും 6070 കാലഘട്ടത്തില്‍ വര്‍ഗീസ് മേഖലയില്‍ കൊലപാതകങ്ങളും കളവുകളും നടത്തിയിട്ടുണ്ടെന്നും ആഭ്യന്തര വകുപ്പ് അണ്ടര്‍ സെക്രട്ടറിയായ സന്തോഷ് കുമാര്‍ ആര്‍ നല്‍കിയ സത്യവാങ്മൂലത്തില്‍ പറയുന്നു. 1970-ല്‍ വര്‍ഗീസിനെ വെടിവെച്ചു കൊന്നതിനു ശേഷം നിയമസഭയില്‍ സിപിഐഎം ഈ വിഷയം ഉന്നയിച്ചിരുന്നു. അന്നത്തെ ആഭ്യന്തര മന്ത്രി സിഎച്ച് മുഹമ്മദ് കോയക്കും മുഖ്യമന്ത്രി സി അച്യുത മേനോനും എതിരെ പ്രക്ഷോഭങ്ങള്‍ അക്കാലത്ത് ഉണ്ടാവുകയും ചെയ്തു. ഈ നിലപാടിന് വിരുദ്ധമാണ് സത്യവാങ്മൂലം.
ഈ കേസില്‍ ഐജി ലക്ഷ്മണയെ ജീവപര്യന്തം തടവിന് ഹൈക്കോടതി ശിക്ഷ വിധിച്ചു. കൊലപാതകം കഴിഞ്ഞ് 40 വര്‍ഷങ്ങള്‍ക്ക് ശേഷമാണ് ലക്ഷമണക്ക് ശിക്ഷ ലഭിക്കുന്നത്. ഐജി ലക്ഷ്മണയെ ജീവപര്യന്തം തടവിന് ശിക്ഷിച്ചതിനെ തുടര്‍ന്ന് വര്‍ഗീസിന്റെ സഹോദരങ്ങള്‍ തോമസ്, ജോസഫ്, മറിയം, റോസ എന്നിവര്‍ നഷ്ടപരിഹാരം ആവശ്യപ്പെട്ട് നല്‍കിയ ഹര്‍ജിയെ തുടര്‍ന്നാണ് സര്‍ക്കാര്‍ സത്യവാങ്മൂലം നല്‍കിയത്.
കൊള്ളക്കാരനും കൊലപാതകിയുമായതിനാല്‍ നഷ്ടപരിഹാരത്തിന് അര്‍ഹമല്ലെന്നും സത്യവാങ്മൂലത്തില്‍ പറയുന്നു. ഇതിനെതിരെ സിപിഐ രംഗത്ത് വന്നിരുന്നു. ആഭ്യന്തരവകുപ്പ് സത്യവാങ്മൂലം തിരുത്തണം. സത്യവാങ്മൂലം എല്‍ഡിഎഫ് കാഴ്ചപ്പാടിനോട് യോജിക്കുന്നതല്ലെന്നും സിപിഐ അസി. സെക്രട്ടറി കെ പ്രകാശ് ബാബു ഇന്നലെ വ്യക്തമാക്കിയിരുന്നു. ഏത് സാഹചര്യത്തിലാണ് ഇത്തരത്തിലൊരു സത്യവാങ്മൂലമെന്ന് അന്വേഷിക്കണമെന്നും പ്രകാശ് ബാബു ആവശ്യപ്പെട്ടു. ഇതിന് പിന്നാലെയാണ് സിപിഐഎമ്മും നിലപാട് വ്യക്തമാക്കി എത്തുന്നത്.
Discussion about this post