തിരുവനന്തപുരം: ചീഫ് സെക്രട്ടറി നളിനി നെറ്റോയ്‌ക്കെതിരെ രൂക്ഷവിമര്‍ശനങ്ങളുമായി ടിപി സെന്‍കുമാര്‍. പുറ്റിങ്ങല്‍ വെടിക്കെട്ട് ദുരന്തത്തിലെ റിപ്പോര്‍ട്ടില്‍ നളിനി നെറ്റോ കൃത്രിമം കാട്ടിയതായി സെന്‍കുമാര്‍ ആരോപിച്ചു. എസ്എം വിജയാനന്ദ് ചീഫ് സെക്രട്ടറി ആയതുമുതല്‍ നളിനി നെറ്റോയ്ക്ക് തന്നോട് വിരോധമാണെന്നും കണിച്ചുകുളങ്ങരയിലെ തൊണ്ടിമുതല്‍ കേസില്‍ തന്നെ കുടുക്കാന്‍ നളിനി നെറ്റോ ശ്രമിച്ചെന്നും സെന്‍കുമാര്‍ വ്യക്തമാക്കി. ഒരു സ്വകാര്യ ചാനലിന് നല്‍കിയ അഭിമുഖത്തിലാണ് സെന്‍കുമാര്‍ ഇക്കാര്യം വ്യക്തമാക്കിയത്.
2016 ഫെബ്രുവരി 15ലെ ക്യാബിനറ്റ് തീരുമാനപ്രകാരമാണ് ചീഫ് സെക്രട്ടറിയായി എസ്എം വിജയാനന്ദ് നിയമിതനായത്. താനാണ് എസ്എം വിജയാനന്ദിനെ തിരികെ കൊണ്ടുവന്നതെന്ന് കരുതിയാണ് നളിനി നെറ്റോ തന്നോട് പ്രത്യേകരീതിയില്‍ പെരുമാറുന്നതെന്നാണ് താന്‍ മനസ്സിലാക്കിയിട്ടുള്ള കാര്യമെന്നും ടിപി സെന്‍കുമാര്‍ പറഞ്ഞു.
സര്‍ക്കാര്‍ സുപ്രീം കോടതിയല്‍ നല്‍കിയ പുനപരിശോധന ഹര്‍ജിക്ക് മറുപടി നല്‍കും. വിജിലന്‍സ് ഡയറക്ടര്‍ നിയമനം കേരളപൊലീസ് ചട്ടങ്ങള്‍ അനുസരിച്ചല്ല. തനിക്കെതിരെയുള്ള സര്‍ക്കാരിന്റെ വാദം നിലനില്‍ക്കില്ല. അഭിഭാഷകര്‍ കോടതിയില്‍ നിന്ന് പിന്‍വാങ്ങിയത് പുനര്‍നിയമനം ഉടന്‍ ലഭിക്കുമെന്ന പ്രതീക്ഷയെത്തുടര്‍ന്നാണെന്നും സെന്‍കുമാര്‍ പറഞ്ഞു.
ഉദ്യോഗസ്ഥതലത്തിലെ ആറ് പേരാണ് തന്നെ ദ്രോഹിക്കുന്നത്. മിന്നുന്നതെല്ലാം പൊന്നാണോയെന്ന് മാധ്യമങ്ങള്‍ പരിശോധിക്കണമെന്നും അദ്ദേഹം കൂട്ടിച്ചേര്‍ത്തു.
Discussion about this post