ശ്രീനഗര്‍: ജോലിക്കിടയില്‍ കൊല്ലപ്പെടുന്ന സൈനികര്‍ക്ക് ഒരുകോടി രൂപ ജീവനാംശമായി നല്‍കുകയാണ് സര്‍ക്കാരിന്റെ ലക്ഷ്യമെന്ന് കേന്ദ്ര ആഭ്യന്തരമന്ത്രി രാജ്‌നാഥ് സിങ്. കേന്ദ്ര സര്‍ക്കാരിന് കീഴിലുള്ള ജവാന്മാരുടെ കുടുംബത്തിനാണ് സഹായം ലഭ്യമാക്കാന്‍ ആലോചന. കാശ്മീരിലെ ഖനബാല്‍ ഹെഡ്ക്വാര്‍ട്ടേഴ്‌സില്‍ നടക്കുന്ന സൈനിക സമ്മേളനത്തില്‍ സംസാരിക്കുകയായിരുന്നു അദ്ദേഹം.
കാശ്മീല്‍ സിആര്‍പിഎഫിന് ഹെലികോപ്റ്റര്‍ സേവനം ലഭ്യമാക്കുമെന്നും മന്ത്രി പറഞ്ഞു. സിആര്‍പിഎഫിന്റെ സേവനത്തില്‍ കേന്ദ്ര സര്‍ക്കാരിന് അഭിമാനമുണ്ട്. ധൈര്യം ഏതെങ്കിലും ചന്തയില്‍ വാങ്ങാന്‍ കിട്ടുന്നതല്ല. എന്നാല്‍, സിആര്‍പിഎഫ് ജവാന്മാരുടെ ധൈന്യം സമാനതകളില്ലാത്തതാണ്. സര്‍ക്കാര്‍ അതില്‍ ഏറെ അഭിമാനിക്കുന്നെന്നും അദ്ദേഹം പറഞ്ഞു.
ജമ്മു കശ്മീര്‍ പോലീസിനും കൂടുതല്‍ സഹായം നല്‍കാന്‍ പദ്ധതി തയ്യാറാക്കിയിട്ടുണ്ട്. പോലീസുകാര്‍ക്കായി പ്രത്യേക ആശുപത്രി പണിയും. ബുള്ളറ്റ് പ്രൂഫ് വാഹനങ്ങളും വാങ്ങും. കടുത്ത സാഹചര്യത്തിലാണ് കാശ്മീരിലെ പോലീസ് ജോലി ചെയ്യുന്നത്. പ്രധാനമന്ത്രിപോലും കാശ്മീര്‍ പോലീസിന്റെ സേവനത്തെ വിലമതിക്കുന്നതായും മന്ത്രി പറഞ്ഞു. കാശ്മീരില്‍ പലയിടത്തും സംഘര്‍ഷം തുടരുമ്പോഴാണ് മന്ത്രി ഇവിടെ സന്ദര്‍ശനം നടത്തുന്നത്. മന്ത്രിയുടെ വരവിന് മുന്നോടിയായി കാശ്മീരില്‍ ഭീകരാക്രമണമുണ്ടായിരുന്നു.
Discussion about this post