തിരുവനന്തപുരം: വ്യാജരേഖയുണ്ടാക്കി യാത്രാബത്ത കൈപ്പറ്റിയെന്ന ആരോപണത്തില്‍ ദേവസ്വം ബോര്‍ഡ് മുന്‍ പ്രസിഡന്റ് പ്രയാര്‍ ഗോപാലകൃഷ്ണനും ബോര്‍ഡംഗം അജയ് തറയിലിനുമെതിരെ അന്വേഷണം നടത്തുമെന്ന് ദേവസ്വംമന്ത്രി കടകംപള്ളി സുരേന്ദ്രന്‍. തിരുവനന്തപുരത്ത് ദേവസ്വം ബോര്‍ഡ് യോഗത്തില്‍ പങ്കെടുത്ത അതേദിവസങ്ങളില്‍ ശബരിമലയില്‍ ഉണ്ടായിരുന്നെന്ന് കാട്ടി ഇവര്‍ യാത്രാബത്ത കൈപ്പറ്റിയിരുന്നു. ശബരിമലയിലെ സന്ദര്‍ശക രജിസ്റ്ററിലോ യോഗം മിനിട്ട്‌സിലോ കൃത്രിമത്വം നടത്തിയെന്നാണ് കരുതുന്നത്.
മൂന്ന് വര്‍ഷം കാലാവധിയുണ്ടായിരുന്ന തിരുവിതാംകൂര്‍ ദേവസ്വം ബോര്‍ഡിനെ അടുത്തിടെ ഓര്‍ഡിനന്‍സിലൂടെ സംസ്ഥാന സര്‍ക്കാര്‍ പിരിച്ചുവിട്ടിരുന്നു. ബോര്‍ഡിന്റെ കാലാവധി രണ്ട് വര്‍ഷമായി വെട്ടിച്ചുരുക്കി സര്‍ക്കാര്‍ ഇറക്കിയ ഓര്‍ഡിനന്‍സ് വിശദീകരണം ആവശ്യപ്പെട്ടതിന് ശേഷമാണ് ഗവര്‍ണര്‍ ഒപ്പിട്ടത്. അഴിമതിയും കെടുകാര്യസ്ഥതയും മൂലമാണ് ബോര്‍ഡിനെ പിരിച്ചു വിടുന്നതെന്നാണ് സര്‍ക്കാര്‍ വിശദീകരണം നല്‍കിയത്.
Discussion about this post