പെട്രോളും ഡീസലും ഉള്‍പ്പടെയുള്ള ഉത്പന്നങ്ങളെ ചരക്ക് സേവന നികുതിയില്‍ ഉള്‍പ്പെടുത്താനുള്ള നീക്കങ്ങളുമായി കേന്ദ്ര സര്‍ക്കാര്‍ മുന്നോട്ട്.ഇതോടെ പെട്രോളിനും, ഡീസലിനും രാജ്യവ്യാപകമായി 32 ശതമാനത്തിലേറെ വില കുറയും. സംസ്ഥാനങ്ങളുടെ സഹകരണത്തോടെ ഇത് വരുന്ന മാസങ്ങളില്‍ നടപ്പാക്കാന്‍ കഴിയുമെന്ന് പ്രതീക്ഷിക്കുന്നതായി മുഖ്യ സാമ്പത്തിക ഉപദേഷ്ടാവ് അരവിന്ദ് സുബ്രമണ്യന്‍ വ്യക്തമാക്കി.
പ്രധാന വരുമാന മാര്‍ഗ്ഗമായ നികുതി നിലയ്ക്കുന്നത് ചില സംസ്ഥാന സര്‍ക്കാറുകള്‍ അംഗീകരിക്കാന്‍ സാധ്യതയില്ല. നികുതി കുറക്കാനുള്ള കേന്ദ്രനിര്‍ദ്ദേശത്തോട് വരെ മുഖം തിരിക്കുന്ന നിലപാടാണ് കേരളം ഉള്‍പ്പടെയുള്ള സംസ്ഥാനങ്ങള്‍ സ്വീകരിച്ചത്.
ൃ ജി.എസ്.ടി നടപ്പാക്കുന്നതിന് മുമ്പ് ശക്തമായ പ്രതിഷേധം നിലനിന്നപ്പോള്‍ പെട്രോളിയം ഉല്‍പ്പന്നങ്ങളെയും മദ്യത്തെയും ഒഴിവാക്കിയാണ് കേന്ദ്ര സര്‍ക്കാര്‍ അനുനയത്തിലെത്തിയത്. പെട്രോളിയം ഉത്പന്നങ്ങള്‍ക്ക് ചരക്ക് സേവന നികുതി വരുമെന്ന കാര്യത്തില്‍ സംശയം വേണ്ടെന്ന് മുന്‍പ് ബിഹാര്‍ ഉപമുഖ്യ മന്ത്രി സുശീല്‍ കുമാര്‍ മോദി പറഞ്ഞിരുന്നു. ജി എസ്ടി നെറ്റ് വര്‍ക്ക് സംബന്ധിച്ച മന്ത്രിതലസമിതിയുടെ കണ്‍വീനറാണ് സുശീല്‍ കുമാര്‍ മോദി.
നേരത്തെ പെട്രോളിയം ഉല്‍പ്പന്നങ്ങള്‍ക്കും ചരക്ക് സേവന നികുതി ബാധകമാക്കണമെന്ന് ആശ്യപ്പെട്ട് കേന്ദ്ര പെട്രോളിയം മന്ത്രാലയം ജി.എസ്.ടി കൗണ്‍സിലിന് കത്ത് നല്‍കിയിരുന്നു. എന്നാല്‍ പെട്രോള്‍, ഡീസല്‍ എന്നിവയെ ജി.എസ്.ടിയില്‍ ഉള്‍പ്പെടുത്തുന്നത് എളുപ്പമാകില്ലെന്നാണ് സാമ്പത്തിക വിദഗ്ദരുടെ അഭിപ്രായം. സംസ്ഥാനങ്ങളുടെ വരുമാനത്തില്‍ സിംഹഭാഗവും പെട്രോള്‍-ഡീസല്‍ എന്നിവയുടെ നികുതിയായിട്ടാണ് ലഭിക്കുന്നത്. ഇത് നഷ്ടപ്പെടുത്താന്‍ സംസ്ഥാനങ്ങള്‍ തയ്യാറാകാത്തതാണ് പെട്രോളിയത്തില്‍ നിന്ന് ജി എസ് ടി ഒഴിവാക്കാന്‍ കാരണം. പെട്രോളിയം ഉത്പന്നങ്ങളുടെ വില കുറക്കണമെന്നാവശ്യപ്പെട്ട് സമരം നടത്തുകയും, എന്നാല്‍ ജിഎസ്ടിയില്‍ ഉത്പന്നങ്ങള്‍ ഉള്‍പ്പെടുത്തുന്നത് തടയുകയും ചെയ്യുന്ന ചില സംസ്ഥാനങ്ങളുടെ നിലപാട് അപഹാസ്യമാണെന്നാണ് ബിജെപിയുടെ വിമര്‍ശനം.
Discussion about this post