മല്ലപ്പള്ളി:വൃദ്ധ ജനങ്ങളെ സംരക്ഷിയ്ക്കാന്‍ ഒരു കോടിയിലേറെ വിലമതിക്കുന്ന സ്വത്ത് മുഴുവന്‍ നാടിന് വിഷുക്കൈനീട്ടമായി നല്‍കി ശ്രീധരന്‍പിള്ളയും സരസ്വതിയമ്മ ടീച്ചറും മാതൃകയായി. വയോജനങ്ങള്‍ക്ക് സംരക്ഷണം നല്‍കുക എന്ന സ്വപ്‌ന സാക്ഷാത്ക്കാരത്തിനായി സേവാഭാരതിയുടെ നേതൃത്വത്തില്‍ മുല്ലപ്പള്ളി മുരണിയില്‍ പ്രവര്‍ത്തിക്കുന്ന ശ്രീഭദ്ര സേവാ സമിതിയുടെ ഉപസമിതിയായി തുടങ്ങിയ തുരുത്തിക്കോട് ജാനകിയമ്മ സ്മാരക സേവാ കേന്ദ്രത്തിനോട് അനുബന്ധമായാണ് വയോജന സംരക്ഷണ കേന്ദ്രം തുടങ്ങുന്നത്. സേവാ ഭാരതിയുടെ കീഴിലുള്ള ശ്രീ ഭദ്ര സേവാസമിതിയുടെയും ഗോകുലം ബാലാശ്രമത്തിന്റെ പ്രവര്‍ത്തനത്തില്‍ തല്‍പരയായ ദമ്പതികള്‍ തന്നെയാണ് ഉപസമിതി തുടങ്ങിയത്.
ഇപ്പോള്‍ താമസിക്കുന്ന വീടും ഉള്‍പ്പെടെയാണ് വയോജനാലയത്തിനായി നല്‍കിയത്. വയോജനാലയത്തിന്റെ ഉദ്ഘാടനം വിഷുദിനമായ ബുധനാഴ്ച നടക്കും. തുരുത്തിക്കാട് പ്ലൂക്കട മേപ്രത്ത് എ.ജെ.സരസ്വതിയമ്മ വയനാട് വഞ്ഞോട്ട് എ.യു.പി.സ്‌കൂളില്‍ ദീര്‍ഘകാലം അധ്യാപികയായിരുന്നു. 1990ല്‍ വിരമിച്ചു. ഭര്‍ത്താവ് കവിയൂര്‍ മാകാട്ടില്‍ കുടുംബാംഗം. എം.എന്‍.ശ്രീധരന്‍പിള്ളയ്ക്ക് തയ്യല്‍പ്പണിയായിരുന്നു. എണ്‍പതുകളിലെത്തിയ ഇരുവരും ഇപ്പോള്‍ വിശ്രമജീവിതത്തിലാണ്. ഇവര്‍ക്ക് മക്കളില്ല.
ടീച്ചറിന് അമ്മ ജാനകിയമ്മയുടെ വീതമായി ലഭിച്ചതും പിന്നീട് വാങ്ങിയ 10 സെന്റും ചേര്‍ത്ത് 51 സെന്റ് സ്ഥലമാണുള്ളത്. ഏതെങ്കിലും പൊതുകാര്യത്തിനായി ഇവിടം വിട്ടുകൊടുക്കാന്‍ ഒരുങ്ങിയപ്പോള്‍ അത് സേവാഭാരതിയ്ക്ക് തന്നെ നല്‍കാന്‍ തീരുമാനിക്കുകയായിരുന്നു. മല്ലപ്പള്ളി സബ് രജിസ്ട്രാര്‍ ഓഫീസിലെത്തി കഴിഞ്ഞദിവസം സമിതിക്ക് സ്ഥലം കൈമാറി രജിസ്‌ട്രേഷന്‍ നടപടികള്‍ പൂര്‍ത്തിയാക്കി.
തുരുത്തിക്കാട് ജാനകിയമ്മ സ്മാരക സേവാകേന്ദ്രത്തിന്റെ കീഴില്‍ ചൈതന്യ വയോജനാലയം എന്ന പേരിലാണ് വയോജനസംരക്ഷണ കേന്ദ്രം ആരംഭിയ്ക്കുന്നത്. എന്‍.പത്മകുമാര്‍ (പ്രസിഡന്റ്), കെ.എസ്.സതീഷ്‌കുമാര്‍ കൊശൂര്‍ (ജന. സെക്രട്ടറി), വി.എം.ജി.പണിക്കര്‍ (രക്ഷാധികാരി) എന്നിവര്‍ മുഖ്യചുമതല വഹിക്കും.
ബുധനാഴ്ച 10.30ന് പ്ലൂക്കട മേപ്രത്ത് വീട്ടില്‍ ചേരുന്ന ലളിതമായ ചടങ്ങില്‍ ശ്രീധരന്‍പിള്ളയെയും സരസ്വതിയമ്മ ടീച്ചറിനെയും പൊന്നാടയണിയിച്ച് ആദരിക്കും.
Discussion about this post