രാഹുല്‍ ഈശ്വറിനെ അറസ്റ്റ് ചെയ്തത് ആന്യായമെന്ന് കെ.പി.സി.സി വര്‍ക്കിംഗ് പ്രസിഡന്റ് കെ.സുധാകരന്‍. അറസ്റ്റിനെ ഒരു രീതിയിലും ന്യായീകരിക്കാനാവില്ലെന്ന് അദ്ദേഹം പറഞ്ഞു. സര്‍ക്കാര്‍ രാഹുല്‍ ഈശ്വറിനെ നേരത്തെ തന്നെ ലക്ഷ്യമിട്ടിരുന്നുവെന്നും രാഹുലിനെ അറസ്റ്റ് ചെയ്ത രീതി ശരിയായില്ലെന്നും സുധാകരന്‍ അഭിപ്രായപ്പെട്ടു. ശബരിമലയില്‍ ആചാരലംഘനം നടന്നാല്‍ രക്തം വീഴ്ത്തി ക്ഷേത്രം അശുദ്ധമാക്കി നട അടച്ചിടാന്‍ പദ്ധതി ഇട്ടു എന്ന പേരിലാണ് രാഹുല്‍ ഈശ്വറിനെ പോലീസ് അറസ്റ്റ് ചെയ്തത്.
അടിയന്തരാവസ്ഥ കാലത്ത് പോലും ഇത്രയധികം അറസ്റ്റുകള്‍ നടത്തിയിട്ടില്ലെന്ന് സുധാകരന്‍ പറഞ്ഞു. ഇത്തരം നടപടികളില്‍ നിന്നും പോലീസ് പിന്തിരിയണമെന്ന് അദ്ദേഹം പറഞ്ഞു. സര്‍ക്കാരിന് പ്രതിഷേധത്തെ അടിച്ചമര്‍ത്താകാനാകില്ലെന്നും പ്രതിഷേധക്കാരുടെ എണ്ണം വര്‍ധിച്ചു വരികയാണെന്നും സുധാകരന്‍ പറഞ്ഞു.
അതേസമയം സ്വാമി സന്ദീപാനന്ദ ഗിരിയുടെ ആശ്രമത്തിനെതിരെ നടന്ന ആക്രമണത്തില്‍ ദുരൂഹതയുണ്ടെന്ന് സുധാകരന്‍ ആരോപിച്ചു. ആക്രമം സന്ദീപാനന്ദഗിരി തന്നെ ചെയ്താലും അത് അപലപനീയമാണെന്ന് അദ്ദേഹം പറഞ്ഞു.
ഇത് കൂടാതെ കോണ്‍ഗ്രസ് നേതാവ് അജയ് തറയിലും രാഹുല്‍ ഈശ്വറിന്റെ അറസ്റ്റിനെതിരെ രംഗത്ത് വന്നിരുന്നു. പ്രസ് ക്ലബ്ബില്‍ നടത്തിയ പത്രസമ്മേളനത്തിന്റെ അടിസ്ഥാനത്തില്‍ കേസെടുക്കുന്നതില്‍ ന്യായമില്ലെന്ന് അദ്ദേഹം ചൂണ്ടിക്കാട്ടി. സന്നിധാനത്ത് രക്തം വീഴ്ത്താന്‍ മറ്റ് ചിലരാണ് പദ്ധതിയിട്ടിരുന്നത് എന്നാണ് രാഹുല്‍ ഈശ്വര്‍ പറഞ്ഞതെന്ന് അദ്ദേഹം പറഞ്ഞു. പദ്ധതിയിട്ട ആളുകളെക്കുറിച്ച് അന്വേഷിച്ച് നടപടി എടുക്കാതെ രാഹുല്‍ ഈശ്വറിന് മേല്‍ കുതിരകയറുകയാണെന്നും ഞായറാഴ്ച അറസ്റ്റ് ചെയ്തത് ഇന്ന് ജാമ്യം കിട്ടാതിരിക്കാനാണെന്നും അജയ് തറയില്‍ പറഞ്ഞു.
Discussion about this post