1984ല്‍ ഇന്ദിരാ ഗാന്ധിയുടെ കൊലപാതകത്തിന് ശേഷം നടന്ന സിഖ് വിരുദ്ധ കലാപത്തില്‍ കോണ്‍ഗ്രസ് നേതാവ് സജ്ജന്‍ കുമാറാണ് ജനക്കൂട്ടത്തെ സിഖുകാര്‍ക്കെതിരെ തിരിച്ച് വിട്ടതെന്ന് സാക്ഷിമൊഴി. പ്രോസിക്യൂഷന്‍ ഹാജരാക്കിയ സാക്ഷിയായ ചാം കൗറാണ് മൊഴി നല്‍കിയത്.
ഡല്‍ഹിയിലെ സുല്‍ത്താന്‍പുരിയില്‍ 1984 ഒക്ടോബര്‍ 31ന് നടന്ന പ്രസംഗത്തില്‍ ഇന്ദിരാ ഗാന്ധിയെ കൊലപ്പെടുത്തിയത് സിഖുകാരാണെന്നും അവരെ തിരിച്ച് ആക്രമിക്കണമെന്നും സജ്ജന്‍ കുമാര്‍ പറഞ്ഞതായി താന്‍ കണ്ടുവെന്ന് ചാം കൗര്‍ ഡല്‍ഹിയിലെ ഒരു കോടതിയില്‍ മൊഴി നല്‍കി. സജ്ജന്‍ കുമാറിന്റെ പ്രേരണ മൂലമുണ്ടായ ആക്രമണത്തില്‍ തനിക്ക് തന്റെ പിതാവിനെയും മകനെയും നഷ്ടപ്പെട്ടുവെന്നും ചാം കൗര്‍ പറഞ്ഞു.
മകന്‍ കപൂര്‍ സിംഗിനെയും പിതാവ് സര്‍ദാര്‍ജി സിംഗിനെയുമാണ് ചാം കൗറിന് നഷ്ടപ്പെട്ടത്. ഇവരെ ആക്രമികള്‍ ക്രൂരമായി മര്‍ദ്ദിച്ച് കൊലപ്പെടുത്തുകയായിരുന്നുവെന്നും ചാം കൗര്‍ പറയുന്നു. ഇതിന് മുമ്പ് മറ്റൊരു സാക്ഷിയായ ഷീലാ കൗറും സജ്ജന്‍ കുമാറിനെതിരെ മൊഴി നല്‍കിയിരുന്നു.
Discussion about this post