മുഖ്യമന്ത്രി പിണറായി വിജയന്‍ നേതൃത്വം നല്‍കി നടത്താനിരിക്കുന്ന വനിതാ മതിലിനെതിരെ വിമര്‍ശനവുമായി പ്രതിപക്ഷ നേതാവ് രമേശ് ചെന്നിത്തല. മതില്‍ ആരും പൊളിക്കേണ്ടയാവശ്യമില്ലെന്നും അത് സ്വയം പൊളിഞ്ഞ് വീഴാനാണ് സാധ്യതയെന്നും രമേശ് ചെന്നിത്തല പറഞ്ഞു. മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. വനിതാ മതില്‍ പൊളിക്കുമെന്ന പ്രതിപക്ഷ നേതാവിന്റെ നിലപാട് സ്ത്രീ വിരുദ്ധമാണെന്ന് മുന്‍പ് മുഖ്യമന്ത്രി ആരോപിച്ചിരുന്നു.
വനിതാ മതില്‍ പരിപാടിക്ക് വേണ്ടി മുഖ്യമന്ത്രി വിളിച്ച് ചേര്‍ത്ത സംഘടനകളില്‍ പലരും പരിപാടിയില്‍ നിന്നും വിട്ട് നില്‍ക്കുമെന്ന് വ്യക്തമാക്കിയിട്ടുണ്ടെന്ന് രമേശ് ചെന്നിത്തല ചൂണ്ടിക്കാട്ടി.
ഇത് കൂടാതെ കേരളത്തിന്റെ നവോത്ഥാന പ്രസ്ഥാനങ്ങളില്‍ സി.പി.എമ്മിന് യാതൊരു പങ്കുമില്ലെന്നും രമേശ് ചെന്നിത്തല ആരോപിച്ചു. വൈക്കം, ഗുരുവായൂര്‍ തുടങ്ങിയ സത്യാഗ്രഹങ്ങള്‍ കോണ്‍ഗ്രസിന്റെ നേതൃത്വത്തിലാണ് നടന്നതെന്നും അത് ചുളുവില്‍ തട്ടിയെടുക്കാനാണ് സര്‍ക്കാര്‍ ശ്രമിക്കുന്നതെന്നും രമേശ് ചെന്നിത്തല പറഞ്ഞു. മുഖ്യമന്ത്രി പിണറായി വിജയന്റെ പെരുമാറ്റം കണ്ടാല്‍ നവോത്ഥാനത്തിന്റെ ഹോള്‍സെയില്‍ വ്യാപാരം അദ്ദേഹത്തിനും അദ്ദേഹത്തിന്റെ പാര്‍ട്ടിക്കുമാണെന്ന തോന്നിപ്പോകുമെന്നും രമേശ് ചെന്നിത്ത പറഞ്ഞു.
ഹിന്ദു സംഘടനകളെ മാത്രം വിളിച്ച് നവോത്ഥാന പാരമ്പര്യത്തെപ്പറ്റി ഓര്‍മ്മിപ്പിക്കുന്നത് ചരിത്രത്തോടുള്ള അനീതിയാണെന്നും രമേശ് ചെന്നിത്തല പറഞ്ഞു. ക്രിസ്തു മതത്തിലും ഇസ്ലാം മതത്തിലും നടന്ന നവോത്ഥാന പ്രവര്‍ത്തനങ്ങളെ പിണറായി വിജയന്‍ ബോധപൂര്‍വ്വം മറക്കുകയാണെന്നും രമേശ് ചെന്നിത്തല കുറ്റപ്പെടുത്തി.
Discussion about this post