ബി.ജെ.പി നേതൃത്വത്തെ നിരന്തരമായി വിമര്‍ശിച്ചുകൊണ്ടിരിക്കുന്ന ബി.ജെ.പി എം.പി ശത്രുഘ്നന് സിന്‍ഹയോട് പാര്‍ട്ടിയോട് താല്‍പര്യമില്ലെങ്കില്‍ വിട്ട് പൊയ്‌ക്കൊള്ളാന്‍ പറഞ്ഞിരിക്കുകയാണ് ബി.ജെ.പി നേതാവ് സുശീല്‍ കുമാര്‍ മോദി. യശ്വന്ത് സിന്‍ഹയുമായുള്ള മോശം കൂട്ടുകെട്ടില്‍ പെട്ടിരിക്കുകയാണ് ശത്രുഘ്നന് സിന്‍ഹയെന്നും ബീഹാര്‍ ഉപമുഖ്യമന്ത്രി കൂടിയായ സുശീല്‍ കുമാര്‍ മോദി പറഞ്ഞു. ഒരു ടി.വി ചാനല്‍ സംഘടിപ്പിച്ച പരിപാടിയില്‍ പങ്കെടുത്ത് സംസാരിക്കുകയായിരുന്നു സുശീല്‍ കുമാര്‍ മോദി.
ബി.ജെ.പി നേതാക്കളെ പലപ്പോഴും ശത്രുഘ്നന് സിന്‍ഹ വിമര്‍ശിക്കാറുണ്ട്. ഇന്ധന വില വര്‍ധനവിനെതിരെയും നോട്ട് നിരോധനത്തിനെതിരെയും ശത്രുഘ്നന് സിന്‍ഹ സംസാരിച്ചിരുന്നു. ഇവ മൂലമുണ്ടായ പ്രശ്‌നങ്ങള്‍ക്ക് കാരണക്കാരന്‍ പ്രധാനമന്ത്രി നരേന്ദ്ര മോദിയാണെന്നും അദ്ദേഹം പറഞ്ഞു.
രണ്ട് തവണ രാജ്യ സഭാ എം.പിയും രണ്ട് തവണ ലോക്‌സഭാ എം.പിയും ഒരു തവണ ക്യാബിനറ്റ് മന്ത്രിയുമായ ശത്രുഘ്നന് സിന്‍ഹയ്ക്ക് ഈ അവസരങ്ങളൊക്കെ ഒരുക്കിത്തന്ന പാര്‍ട്ടിക്കെതിരായിട്ടാണ് അദ്ദേഹം സംസാരിക്കുന്നതെന്നും സുശീല്‍ കുമാര്‍ മോദി പറഞ്ഞു. കഴിഞ്ഞ തവണ പട്‌നാ സാഹിബ് മണ്ഡലത്തില്‍ നിന്നും മത്സരിച്ച് വിജയിച്ച ശത്രുഘ്നന് സിന്‍ഹയ്ക്ക് ഇതിന് സഹായം നല്‍കിയത് ബി.ജെ.പി നേതാക്കളായ നന്ദ് കിശോര്‍ യാദവും സഞ്ജീവ് ചൗരാസിയയും അരുണ്‍ കുമാര്‍ സിന്‍ഹയും നിതിന്‍ നവീനുമാണെന്ന് സുശീല്‍ കുമാര്‍ മോദി പറഞ്ഞു.
2019ലും പട്‌നാ സാഹിബില്‍ നിന്നുകൊണ്ട് മത്സരിക്കാനാണ് ശത്രുഘ്നന് സിന്‍ഹയുടെ പദ്ധതി. എന്നാല്‍ വേറെ പാര്‍ട്ടിയിലേക്ക് പോകുമോയെന്ന കാര്യത്തില്‍ അദ്ദേഹം വ്യക്തത നല്‍കിയിട്ടില്ല.
Discussion about this post