ഇടുക്കി: സബ്കളക്ടറെ വ്യക്തിഹത്യ നടത്തിയത് വിവാദമായിട്ടും കലി തീരാതെ സിപിഎം എംഎല്എ എസ് രാജേന്ദ്രന്. സംഭവത്തില് മാപ്പ് പറയുന്ന പ്രശ്നമില്ല. തന്നോട് സബ്കളക്ടര് രേണു രാജ് മോശമായി പെരുമാറിയെന്നും സ്പീക്കര്ക്ക് പരാതി നല്കുമെന്നും എസ് രാജേന്ദ്രന് പറഞ്ഞു.
സബ് കളക്ടര് തന്റെ ഫോണ് കട്ട് ചെയ്തു. അതിന് അവര്ക്ക് അധികാരമില്ല. ഇത് എല്ലാം ചൂണ്ടിക്കാട്ടി സ്പീക്കര്ക്ക് രേണു രാജിനെതിരെ പരാതി നല്കുമെന്നും അദ്ദേഹം പറഞ്ഞു. ഏഷ്യാനെറ്റ് ന്യൂസ് ചര്ച്ചയിലാണ് എംഎല്എ ഇക്കാര്യം പറഞ്ഞത്.
പദ്ധതി പൂര്ത്തിയാക്കുന്ന സമയത്തല്ല എതിര്പ്പുമായി രംഗത്ത് വരേണ്ടത്. സബ് കളക്ടര് ഇരിക്കുന്ന കെട്ടിടത്തിനടുത്ത് പണിത പുതിയ കെട്ടിടത്തിന് എല്ലാ അനുമതിയുമുണ്ടോ? എന്ന് അദ്ദേഹം ചോദിച്ചു. സര്ക്കാരിന് വിഷയത്തില് കൃത്യമായ നിലപാടുണ്ട്. ‘ഞാന് നേരിട്ട് പോയി സബ് കളക്ടറെ കണ്ടപ്പോള് തന്റെ കാര്യം താന് നോക്ക്, എന്റെ കാര്യം ഞാന് നോക്കാം’ എന്ന് ഡോ രേണു രാജ് പറഞ്ഞതായി എംഎല്എ ആരോപിച്ചു.
എന്നാല്, രേണുരാജ് ഇത് നിഷേധിച്ചിട്ടുണ്ട്. എസ്. രാജേന്ദ്രനെ എം.എല്.എ. എന്നുമാത്രമാണ് വിളിച്ചത്. നിര്മാണം തുടര്ന്നാല് നടപടിയെടുക്കുമെന്നാണ് പറഞ്ഞത് സബ് കളക്ടര് അറിയിച്ചു.
അവള് ഇതെല്ലാം വായിച്ചുപഠിക്കണ്ടേ. സ്കെച്ചും പ്ലാനും അംഗീകരിച്ചിട്ടാണോ? എന്.ഒ.സി. വാങ്ങിച്ചിട്ടാണോ? നാളെ ഇവര് ഒടക്കിയാല് ഉദ്ഘാടനം ചെയ്യാന്പറ്റുമോ? അവള് ബുദ്ധിയില്ലാത്തവള്. വെറും ഐ.എ.എസ്. കിട്ടിയെന്നുപറഞ്ഞ് കോപ്പുണ്ടാക്കാന് വന്നിരിക്കുന്നു. കളക്ടറാകാന്വേണ്ടിമാത്രം പഠിച്ചിട്ട് കളക്ടറാകുന്ന ആളുകള്ക്ക് ഇത്രയും ബുദ്ധിക്കുറവുണ്ടോ.
ബില്ഡിങ് റൂള്സ് പഞ്ചായത്ത് വകുപ്പാണ്. അവള്ക്കിടപെടാന് യാതൊരു റൈറ്റുമില്ല. അവളുടെ പേരില് ഇതിന്റെ നാശനഷ്ടപരിഹാരം ആവശ്യപ്പെട്ട് കൂട്ടിവന്ന പോലീസിനെയും ഇവളെയും ചേര്ത്ത് പ്രൈവറ്റ് കേസ് ഫയല് ചെയ്യുക. മൂന്നാറില്കൂടി നാളെ റോഡ് ടാര് ചെയ്യണമെങ്കില് നാളെ എന്.ഒ.സി. ചോദിച്ചാലോ. ഇതൊരു ജനാധിപത്യ രാജ്യമല്ലേ. എന്നിട്ട് ജനപ്രതിനിധികള് പറഞ്ഞാല് കേക്കത്തില്ലെന്ന് പറഞ്ഞാല്.–എന്നിങ്ങനെയായിരുന്നു എസ് രജേന്ദ്രന്റെ പ്രസ്താവന.
2010ലെ ഹൈക്കോടതി ഉത്തരവ് പ്രകാരമുള്ള ജില്ലാ കളക്ടറുടെ എന്.ഒ .സി ഇല്ലാതെയാണ് നിര്മ്മാണം നടക്കുന്നതെന്ന് കണ്ടെത്തിയതിനെ തുടര്ന്ന് പഞ്ചായത്ത് വനിതാ വ്യവസായകേന്ദ്രത്തിന്റെ പണി നിര്ത്തിവയ്ക്കാന് സബ് കളക്ടര് ഉത്തരവിട്ടതാണ് തര്ക്കങ്ങള്ക്ക് കാരണം. പഴയ മൂന്നാറില് മുതിരപ്പുഴയാറിനോട് ചേര്ന്നാണ് നിര്മ്മാണം നടക്കുന്നത്.
മൂന്നാര് പഞ്ചായത്തിന്റെ ഷോപ്പിങ് കോപ്ലക്സ് നിര്മാണം തടയാന് വെള്ളിയാഴ്ചയാണ് റവന്യൂ സംഘം എത്തിയത്. ഇവരെ എം.എല്.എ.യുടെയും പഞ്ചായത്ത് പ്രസിഡന്റിന്റെയും നേതൃത്വത്തില് തടയുകയും തിരിച്ചയയ്ക്കുകയും ചെയ്തു. ഇതിനിടെയാണ് എം.എല്.എ. സബ്കളക്ടര്ക്കെതിരേ മോശമായ ഭാഷയില് സംസാരിച്ചത്. ലോക്കല് ചാനല് പ്രവര്ത്തകര് ഇത് പകര്ത്താന്ശ്രമിച്ചപ്പോള് അപകടം മണത്ത എം.എല്.എ. സ്ഥലത്തുനിന്ന് മാറി. എന്നാല്, വീഡിയോദൃശ്യങ്ങള് ചാനലുകളിലൂടെ പ്രചരിച്ചപ്പോള് വിവാദമാകുകയായിരുന്നു.
Discussion about this post