പുല്‍വാമയില്‍ ഭീകരാക്രമണം നടത്തിയ ജയ്ഷ്-എ-മുഹമ്മദ് തലവന്‍ മസൂദ് അസര്‍ പാക്കിസ്ഥാനിലുണ്ടെന്ന് ഐക്യരാഷ്ട്രസഭയുടെ രക്ഷാസമിതിയിലെ എല്ലാ രാഷ്ട്രങ്ങള്‍ക്കുമറിയാമെന്ന് ഇന്ത്യന്‍ വിദേശകാര്യ മന്ത്രാലയം പറഞ്ഞു. അതുകൊണ്ട് എത്രയും വേഗം മസൂദ് അസറിനെ ആഗോള ഭീകരവാദിയായി പ്രഖ്യാപിക്കുന്നതില്‍ രാഷ്ട്രങ്ങള്‍ പിന്തുണ നല്‍കണമെന്ന് ഇന്ത്യ ആവശ്യപ്പെട്ടു. വിദേശകാര്യ മന്ത്രാലയ വക്താവ് രവീഷ് കുമാര്‍ പത്രസമ്മേളനത്തിലാണ് ഇക്കാര്യങ്ങള്‍ പറഞ്ഞത്.
പുല്‍വാമ ഭീകരാക്രമണത്തെ അപലപിച്ചുകൊണ്ട് ഐക്യരാഷ്ട്രസഭയുടെ രക്ഷാസമിതിയിലെ 15 രാഷ്ട്രങ്ങളും സംസാരിച്ചിരുന്നുവെന്ന് ഇന്ത്യ ചൂണ്ടിക്കാട്ടി. മസൂദ് അസറിനെ ആഗോള ഭീകരവാദിയായി പ്രഖ്യാപിക്കണമെന്ന് കഴിഞ്ഞയാഴ്ച യു.എസും, ബ്രിട്ടനും, ഫ്രാന്‍സും രക്ഷാസമിതിയില്‍ പ്രമേയം കൊണ്ടുവന്നിരുന്നു. മാര്‍ച്ച് 13 വരെ പ്രമേയത്തില്‍ വിശദീകരണം രാഷ്ട്രങ്ങള്‍ക്ക് ചോദിക്കാവുന്നതാണ്. ഇത് കഴിഞ്ഞാല്‍ ആഗോള ഭീകരവാദിയായി പ്രഖ്യാപിക്കുന്നതിന് വേണ്ടിയുള്ള പ്രക്രിയകളിലേക്ക് കടക്കുന്നതായിരിക്കും.
ആഗോള ഭീകരവാദിയായി പ്രഖ്യാപിക്കപ്പെട്ടാല്‍ മസൂദ് അസറിന്റെ യാത്രകള്‍ക്കും വസ്തുവകകള്‍ക്കും വിലക്ക് വരുന്നതായിരിക്കും. ഇതിന് മുന്‍പ് 2009ലും, 2016ലും, 2017ലും മസൂദ് അസറിനെ ആഗോള ഭീകരവാദിയായി പ്രഖ്യാപിക്കുന്നതിനുള്ള പ്രമേയം രക്ഷാസമിതിയില്‍ വന്നിരുന്നു. എന്നാല്‍ എല്ലാ അവസരത്തിലും ചൈന പ്രമേയത്തെ എതിര്‍ത്തു.
Discussion about this post