പോലീസ് സേനാംഗങ്ങൾക്കിടയിൽ വർദ്ധിച്ചുവരുന്ന മാനസിക സംഘർഷവും അതുമൂലമുള്ള ആത്മഹത്യാ പ്രവണതയും തടയുന്നതിനായി പോലീസുകാർക്കിടയിൽ കൂടുതൽ സൗഹൃദാന്തരീക്ഷം വേണമെന്ന് മുഖ്യമന്ത്രി പിണറായി വിജയൻ. പോലീസുകാരുടെ പ്രശ്നങ്ങൾ മനസിലാക്കിവേണം മുതിർന്ന പോലീസുകാർ ഇടപെടാൻ എന്നും മുഖ്യമന്ത്രി കൂട്ടിച്ചേർത്തു. നല്ല കൂട്ടായ്മയും സൗഹൃദാന്തരീക്ഷവും ഉണ്ടെങ്കിൽ വ്യക്തിപരമായ പ്രശ്നങ്ങൾപ്പോലും പരിഹരിക്കാൻ കഴിയുമെന്നും മുഖ്യമന്ത്രി പറഞ്ഞു. പോലീസുകാരുടെ ആത്മഹത്യാ പ്രവണത തടയുന്നതിനെക്കുറിച്ച് ചർച്ചചെയ്യാൻ വിളിച്ച ഉന്നത ഉദ്യോഗസ്ഥരുടെ യോഗത്തിൽ സംസാരിക്കുകയായിരുന്നു മുഖ്യമന്ത്രി.
മേലുദ്യോഗസ്ഥരും കീഴുദ്യോഗസ്ഥരും തമ്മിലുള്ള ബന്ധം ആരോഗ്യകരമായിരിക്കണം. മോശമായ പെരുമാറ്റം ഒരുകാരണവശാലും ഉണ്ടാവാൻ പാടില്ല. എല്ലാ കാര്യങ്ങളിലും പ്രഫഷണൽ സമീപനം ആവശ്യമാണ്. ചുമതലയിൽ വീഴ്ച ഉണ്ടാകുമ്പോൾ മുതിർന്ന ഉദ്യോഗസ്ഥരിൽനിന്നും പ്രതികരണം സ്വാഭാവികമായിരിക്കും. ഇക്കാര്യത്തിൽ വിട്ടുവീഴ്ച ഉണ്ടാവേണ്ടതില്ലെന്നും മുഖ്യമന്ത്രി വ്യക്തമാക്കി.
പോലീസുകാരുടെ കുടുംബപരമോ വ്യക്തിപരമോ ആയ കാര്യങ്ങൾ ജില്ലാ പോലീസ് മേധാവിയുടെ ശ്രദ്ധയിൽക്കൊണ്ടുവന്ന് പരിഹരിക്കാൻ ശ്രമിക്കണം. ജില്ലാ പോലീസ് മേധാവിക്ക് മുകളിലുള്ള ഉദ്യോഗസ്ഥരുമായി ആശയ വിനിയമം ഉണ്ടായിരിക്കണമെന്നും മുഖ്യമന്ത്രി പറഞ്ഞു.
Discussion about this post