ഡല്‍ഹി; സര്‍ക്കാര്‍ ആവശ്യപ്പെട്ടാല്‍ പാകിസ്ഥാന്‍ അധിനിവേശ കശ്മീരില്‍ ഓപ്പറേഷന്‍ നടത്താന്‍ തന്റെ സേന തയാറാണെന്ന് പുതുതായി നിയമിതനായ ആര്‍മി ചീഫ് ജനറല്‍ എം എം നരവാനെ.
പിഒകെയില്‍ പ്വര്‍ത്തനം നടത്താന്‍ സൈന്യം വിവിധ പദ്ധതികള്‍ ആവിഷ്‌ക്കരിച്ചതായി ഒരു വാര്‍ത്താ ചാനലിന് നല്‍കിയ അഭിമുഖത്തില്‍ ആണ് ജനറല്‍ നരവാനെ വ്യക്തമാക്കിയത്. പിഒകെയില്‍ ‘ഏത് ജോലിയും’ ഏറ്റെടുക്കാന്‍ സേന തയ്യാറാണെന്നും അദ്ദേഹം കൂട്ടിച്ചേര്‍ത്തു.അന്താരാഷ്ട്ര അതിര്‍ത്തിയിലും ജമ്മു കശ്മീരിലെ നിയന്ത്രണ രേഖയിലും ഉദ്യോഗസ്ഥരെ വിന്യസിച്ചിട്ടുണ്ടെന്നും ആവശ്യപ്പെട്ടാല്‍ പദ്ധതികള്‍ നടപ്പാക്കാമെന്നും കരസേനാ മേധാവി പറഞ്ഞു.
”ഞങ്ങളെ ചുമതലപ്പെടുത്തിയിട്ടുള്ള ഏതൊരു ജോലിയും ഞങ്ങള്‍ വിജയകരമായി നിര്‍വഹിക്കും,” ജനറല്‍ നരവാനെ അഭിമുഖത്തില്‍ വ്യക്തമാക്കി
നിയന്ത്രണ രേഖയില്‍ ഇന്ത്യക്ക് പൂര്‍ണ്ണമായ അവകാശമുണ്ടെന്ന് നരവാനെ പറഞ്ഞിരുന്നു. പാകിസ്ഥാനില്‍ നിന്ന് ഉയര്‍ന്നുവരുന്ന ഭീകരപ്രവര്‍ത്തനങ്ങളോടുള്ള പ്രതികരണമായി ഇന്ത്യയ്ക്ക് അസാധാരണ നിലപാടുകള്‍ ഇനി പ്രകടിപ്പിക്കേണ്ടിവരുമെന്നും കരസേനാ മേധാവി പറഞ്ഞു.
”സ്റ്റേറ്റ് സ്‌പോണ്‍സര്‍ ചെയ്ത ഭീകരവാദ നയം പാകിസ്ഥാന്‍ നിര്‍ത്തുന്നില്ലെങ്കില്‍, ഭീകര ഭീഷണിയുടെ ഉറവിടങ്ങളില്‍ മുന്‍കൂട്ടി ആക്രമണം നടത്താനുള്ള അവകാശം ഞങ്ങളില്‍ നിക്ഷിപ്തമാണ്. സര്‍ജിക്കല്‍ സ്‌ട്രൈക്കിലും ബാലകോട്ട് പ്രവര്‍ത്തനത്തിലും ഞങ്ങളുടെ പ്രതികരണത്തിന്റെ ഉദ്ദേശ്യം വേണ്ടത്ര പ്രകടമാണ്,” ജനറല്‍ നരവാനെ പറഞ്ഞു. , ഇസ്ലാമാബാദിന് കര്‍ശന മുന്നറിയിപ്പ് ആണ് ഇതിലൂടെ ഇന്ത്യ നല്‍കിയത്.
Discussion about this post